Saturday, October 29, 2011

සුදු මිනිස්සු සහ කළු මිනිස්සු.

මේකත් මට අහම්බෙන් මතක් වූ සිද්ධියක්. මේ සිද්ධිය සිදු වෙලා දැන් වසර 9 විතර ගෙවිලා. මම මගේ පශ්චාත් උපාධි අධ්‍යාපනයට සැරසෙන මුල්ම කාලේ මේක වුනේ. මේ සිද්ධියට මුහුණ දුන්න යුවල එයිටත් වසර ගනනාවකට කලින් සිටම හොදින් මාව හදුනනවා. මම වසර 1997 මගේ වෛද්‍ය ජීවිතය ආරම්භක කාලේ සිටම සම්බන්ධකම් පවත්වාගෙන ගිය පවුලක්. මේ පවුලේ කුඩා දරුවන් තුන් දෙනෙක් හිටියා. මට මතක හැටියට බාලම ලමයාට වයස ඒ කාලේ අවුරුදු 3 - 4 විතර ඇති.

මේ අයට තිබූ අඟ හිගකම් බොහෝමයි. ඉතාම අපහසුවෙන් ජීවිතය ගැටගහ ගත්තා කිව්වොත් හරි. ලමයින්ගේ සුළු සුළු ලෙඩට මම සමහර විට බෙහෙත් දෙන්නේ මුදලක පවා නොගෙන. පියා කරන්නේ රියදුරු රැකියාව. විවාහය සිදුවෙලා තියන්නේ, වයස අඩුවෙන්. කොටින්ම මට හිතෙන්නේ බාල වයස් විවාහයක් කියලා. ඒත් මට නියම වයස දැන ගන්න වුනේ නැහැ. ඒ දෙමාපියන් මම කිසි දිනක ලෙඩ වෙනවා දැක නැහැ. දරුවන්ට වුවත් තිබ්බේ පොඩි පොඩි සෙම අමාරු, බඩරුදාව වැනි දේවල්.

ලමයින්ගේ බඩ පුරවලා මේ දෙන්න දෙමාල්ලො හිස් කුසින් ඉන්න ඇති අනන්තවත්. මමත් සමහර වෙලාවට නිශ්චිත වැඩක් නැතත් මගේ සුළු සුළු වැඩට මේ රියදුරු මහතාව එක්කන් ගොස් මුදල් දෙනවා. එහෙම තමයි ජීවිතය රැක ගන්නේ. ඒ තරම් අපහසුවෙන් මේ අය ජීවත් වුනේ.

දිනක් මා හමුවට පැමිණි මේ පියා සහ මව මාත් එක්ක ලොකු කථාවකට ලැහැස්ති වන බව මට දැණුනා. එහිදී ඇති වූ කථා බහ අනුව මට තේරුම් ගියේ මේකයි. දැන් මෙයාල තව දරුවෙක් පිළිසිඳගෙන මෙයාලගේ අදහස ඒ දරුවා නැති කරන්න. මම කෙලින්ම මේ වැඩේට විරුද්ධ වුනා. මේ නූගත් අහිංසක යුවලට කියා දුන්නා මෙහි ඇති භ්‍යානක පැත්ත. ඒ වගේම මේවැනි දේ ලංකාවේ නීතියෙන් තහනම් බව ආදී දේ මම කියා දුන්නා.

මේ යුවලට අවබෝධය ඇති කිරීමට හැකි වුනා මේ ලැබෙන ලමයා සමහර විටක මුළු පවුලටම එහෙමත් නැත්නම් මුළු රටටම විශාල සේවයක් කල හැකි අයෙක් වුනොත්, එහෙමත් නැත්නම් ඔබ සියළු දෙනාගේ ආරක්ෂකයා මෙයා වෙන්නත් පුළුවන් නේද? කියන කාරණය මෙයාලට පැහැදිලි වුනා. අනික මෙතනදි අමාරුවෙන් හරි මේ දරුවා හදා ගත්තොත් ඔබ කරන්නේ විශාල පිනක් නේද? නැත්නම් ඔබම ප්‍රාණඝාත අකුසලයට සම්බන්ධ වෙනවා නේද? කවදා හරි මේක මතක් වුනහම ඔබට හිතට කොහොම දැනෙයිද? ආදී වශයෙන් තේරුම් කර දේ මේ යුවල ඉතා හොඳින් ග්‍රහනය කලා.

ඔවුන්ගේ රැකියා ප්‍රශ්නෙට අපට පුළුවන් උදව්වක්ද අපි මොවුන්ට ලබා දුන්නා. කෙසේ හෝ මෙහි ඇති විශ්මය දනවන කාරණය මෙයයි. ඔබ දන්නවද ඔවුන් ඒ කරගත් පින මේ හවයේදීම ඔවුන්ට පල දුන්නා. ඒ දරුවා ඉපදී දින කීපයකින් දිනක් ඒ පියා මා සොයා මහ රෑක මගේ ගෙදරට පැමිණියා. ඒ ඉතාම රහසිගතව.

මට මගේ සවන් විශ්වාස නැති වූ පුවතක් ඔහු මට හෙලි කලේ. ඔහු ගත් ලොතරැයියකට පලමු දිනුම ඇදී තිබුනා. පසුදා මම මගේ වාහනයෙන්ම ඔවුන්ව එම මුදල ගැනීමට යැව්වා. අද මොවුන් ඉතාම ලස්සනට ජීවත් වෙනවා. වැඩි දෙයක් බලාපොරොත්තු නැති මොවුන් එම මුදලින් ඉතාම කුඩාවට නිවස තනාගෙන. ලොරියක් මිලදීගෙන තම ජීවිකාව කරගෙන යනවා. හැම වසරකම මේ මිනිස්කම් දත් මිනිසා සිය පවුලම කැටුව මා බැලීමට පැමිණෙනවා.

දැන් වෙනත් කථාවක් කියන්නම්. මා මේ රැකියාව නිසා මිනිසුන් දහස් ගනනක් ආශ්‍රය කර තිබෙනවා. මේ හැමටම තිබෙනවා කථාවක් අපට පැවසීමට මේ හැම කථාවක්ම අප ඇසිය යුතුයි. වෛද්‍ය වෘත්තිය කියන්නේ මගේ වචනයෙන් කියනව නම් අනිත් අයට ඇහුම් කන් දෙන එකට. බෙහෙත් කියන්නේ හැම විටම බොහොම අඩු වැදගත්කමක් තියන දෙයක්. නමුත් ඒ අයගේ හිතේ තියන දේ අහලා ඒකට යම් උපදෙසක් දෙන එක ඒ මිනිස්සුන්ට හරියට වටිනවා. ඒ නිසා මගේ රෝගීන් එන්නේ පැය ගනන් ගත කරන්න බලාගෙන.

මේ සිද්ධියටත් දැන් ටික කාලයක් වෙනවා. මෙයාල ඉතාම වැදගත් යමක් කමක් ඇති මිනිසුන්. ඒත් මෙයාලට ඉන්නේ එක දරුවයි. ඒක මෙදෙන්නට මදි. දැන් උත්සාහය තව දරුවකු සාදා ගන්න. මට මේ අය එක්ක කථා කරනකොට තේරුනා යමක් කියන්න ඉන්නවා නමුත් ඒක කියා ගන්න බැහැ වගේ ගතියක්. කරුණාවෙන් අහනකොට හැමදේම එලියට එනවා. බලත්දි මෙයාල පැය 1/2 විතර කථාවක් මට කිව්වා. මේකයි වෙලා තියන්නේ.

දැන් මෙහෙම හිටියට කලින් ඉතාම අපහසුවෙන් ජීවිතය ගත කරලා තියන්නේ. ඒ කාලෙම දරුවකුත් පිළිසිඳගෙන ගෑනු ලමයෙක් ලැබිලා. ඉන් තවත් මාස තුනකින් පස්සේ තව ලමයෙක් පිළිසිඳගෙන. දැන් අතේ ලමයට මාස හතරක් විතරලු. මේක මේ අයට ඒ වෙලේ සිටි තත්ත්වය අනුව මහා බරක්. ඉපදිලා ඉන්න ලමයට ප්‍රමුඛත්වය ලබා දෙන්න හිතලා ඒ ලමයා ( දෙවනි ) ගප්සා කරවලා.

දැන් කාලයක් ගිහින් ඒත් නැවතත් පිලිසිඳ ගැනීමක් සිදු වී නැහැ. පසු කාලීනව මෙයාලගේ ව්‍යාපාර ඉතාම දියුණු තත්ත්වයට පත් වෙලා. දැන් දෙවනි ලමයෙක්ගේ අවශ්‍යතාවය ඉතාම තදින් දැනෙනවා. ඒ විතරක් නෙමෙයි මේ දෙමාපියන් හඬා වැටෙනවා අර සිද්ධිය ගැන සිතමින්.

මට මේ කථා දෙක දමන්න හිතුනේ වෙන දෙයක් නිසා නෙමෙයි. අපි හැමෝම තුල මේ දෙජාතියෙම මිනිස්සු ඉන්නවා. හැබැයි අපිට තියෙන ප්‍රශ්න තමයි අපි මේ දෙගොල්ලන්ගෙන් එලියට ගන්නේ කාවද කියලා තීරණය කරන එක.


හරියට ප්‍රකෘති විකෘති වගේ. ඔන්න දැන් අපි ආයෙත් විශ්වාරම්භ කථාව ආරම්භ කරන්න කාලේ ඇවිල්ලා......

Wednesday, October 26, 2011

වරද කාගෙද?????

පසුගිය සතියෙම මගෙන් ලියවුනේ එකම වර්ගයේ කථා. අවසාන ලිපියෙන් එය අවසන් කරලා මගේ සුපුරුදු ලිපි වලට යන්න මම සිතා සිටියත් ඊයේ සිදුවුනු සිදුවීමක නිසා මට හිතුනා අදත් මේ ලිපිය ලියල මීට පසුව එන සතියේ මගේ ලිපි වලට එන්න.

ඊයේ මගේ මිත්‍රයෙක්ගේ උපන්දින සාදයක් රාත්‍රියේ තිබුනා. එතැන සිටි අපේ තවත් මිත්‍රයෙක් නිසා තමයි මේ කථාව මට මතකයට ආවේ. ඔහු රජයේ ලියාපදිංචි උපදේශක වරයෙක්.

ඔහු විසින් අපට කියූ කථාවක් තමයි දැන් ටික කලකට පෙර මට මුහුණ දෙන්න සිදු වූ මෙම සිදුවීම මතකයට ආවේ. මම මේ කථාව ඔබට මෙසේ කියන්නම්. මෙහිදී කිසිම කෙනෙක්ට මේ අය හදුනා ගන්න පහසු නොවෙන ආකාරයට තමයි මේ කථාව මම කියන්නේ. ඒ නිසා තමන් දන්නා කියන, අහලා තියන, කිසිම කථාවක් සමග මේක සංසන්දනය කරන්න එපා. මම ඔබට කියනතෙක්ම ඒ කථාව දන්නේ අපි කීප දෙනයි.

මේ කථාවේ අම්මා ගැන මුලින් කියන්නම්. ඇය ඉහල මධ්‍යම පාන්තික පවුලක දරුවෙක්. උසස් අධ්‍යපනයක් නොලැබුනත් ඉහළ පෙලේ පාසලකින් අධ්‍යාපනය හැදෑරූ කාන්තාවක්. සමාජයට විනෝදයට ලැදි අයෙක්. ගෙදර දොර වැඩ වලට වැඩි උනන්දුවක් නැති ඇය තම සැමියාව පාලනය කරගෙන සිටින්නියක්. උසස් කාන්තා සමාජයේ පුහු ආඩම්බරයෙන් හැසිරීමට ප්‍රිය ඇත්තියක්.

මැය තම පාසැල් අවධියේත් තරුණ අවධියේත් පුරුෂ සමාගමයට දැඩි ලොල් සිතැත්තියක්. ඒ නිසාම පරපුරුෂ සේවණයටත් යොමූ මැය තම විවාහක පුරුෂයාට අමතරව තව පුරුෂයන් කීපදෙනෙක් වරින් වර ඇසුරට යොමු වූ අයෙක්. කෙසේ හෝ මැයගේ මේ සියළු රහස් සම්බන්ධතාවයන් යම් දිනකදී ඇයගේ සැමියාට හසු වනවා සේම ඉන් ඇගේ විවාහ දිවිය සෑහෙන කැලබීමකටද ලක් වෙනවා. අවාසනාවකට ඇය ඒ වන විට දෙදරු මවක්. වැඩිමල් දියණිය, ඊට වසර කීපයක් බාල පුතණුවන්.

දරුවන් දෙදෙනාගේ පිනට මේ යුවල ඉහත සියළු පෙර වරදවල් සාදාගෙන නැවතත් එක පවුලක් ලෙස ජීවිතය ගෙනියන්න යම් අධිෂ්ටානයක් ඇති කර ගන්නවා.

දැන් අපි බලමු මේ ස්වාමි පුරුෂයා ගැන. ඔහුත් ඉහළ මධ්‍යම පාන්තික පවුලක එක් දරුවෙක්. යම් පමණක ඉහළ ඉගෙනීමක් ලබා ඇතත් සමාජ වගකීම් දරා හෝ ලෝක යථාර්ථයන් එතරම් තේරුම් නොගත්තෙක් වන අතර දැඩි මිතුරු ඇසුරටත්, වෙනත් කාන්තාවන් ඇසුරටත්, මුදල් පාලනයකින් තොරව වියදමටත්, තම තරුණ වියේදීම පුරුදු වෙන්වා. මේ නිසා මොහුගේ මව්පියන් මොහුව තම පවුල් සමඟ සම්බන්ධයක් තිබූ තම සම සමාජ තලයක යුවතියක් වූ ඉහත කාන්තාවට ආවාහ කර දෙනවා. දරුවන් ලැබෙත්දී මේ පුරුෂයාට යම් වගකීම පිළිබඳ හැගීමක් සිතට ආවත් තම බිරිදත් සමග ඉහළ මද්‍යම පාන්තික ජීවිතය ගෙනයන්නට දරන වෙහෙස නිසා තම වගකීම් අමතක කර ජීවත් වීමට පෙලබෙනවා. එයට බිරිදගෙන්ද ලැබෙන්නේ නොමද සහයක්.

දිනක් නොසිතූ ලෙස බිරිදගේ අනාචාරයක් අතටම හසුවන මොහු දැඩි මානසික පීඩනයකට ලක් වනවා. වෛද්‍ය සහයෙන් කෙසේ හෝ තම සිත හදා ගන්නා මේ පුදගලයා තම දරුවන්ට දැඩි ලෙස ආදරය කරනවා. ඒ නිසාම බිරිදට සමාව ලැබෙන අතර ඇයට සියළු සමාජ සම්බන්ධතා පැවැත්වීම ඉන් පසුව නවත්වනවා. එපමණක් නොවෙයි තම ජීවන රටාවද අංශක 180 අනෙක් පැත්තට හරවන මොහු තම කුටුම්භයටම සීමා වීමට පටන් ගන්නවා.

කෙසේ වෙතත් මෙවැනි අයෙක් තම සිතේ ඇතිවන වෛරය එකපාරටම එලියට දාන්නේ නැහැ. මොහුත් ඒ වගේ අයෙක්. ඔහු බිරියගෙන් පලි ගන්න අපූරු ක්‍රමයක් සොයා ගන්නවා.........

අපි දැන් මේ දරුවො ගැන බලමු. පිරිමි දරුවා ඉතාම කුඩයි, මේවැනි දෙයක් තෙරෙන වයසක නෙමෙයි ඔහු සිටින්නේ. දියණිය වැඩිවිය පැමිණෙන්නේ මේ කාලයේම. අඹුසැමි අරෝව අවසාන වෙන්න බලපාන්නේත් මේ කාරණය. නමුත් මේ දියණියට මවගේ රහස් සියල්ලම ඉතාමත් රහසින් පියා විසින් හෙලි කරනවා. ඒ නිසා ඇය තම මව සමග දැඩි වෛරයකින් පසු වෙනවා. ඇය සලකන්නේ මව තමාට උපදෙස් දීමටවත් සුදුසු අයෙක් ලෙස නොවෙයි. මේ නිසාම මේ මව දියණියට හිතූවක් කර ගැනීමට හැර නිසොල්මන් වෙනවා. දැන් මේ තරුණ දියණිය මවගේ රැකවරනයේම සිටිය යුතු කාලයේ එම රැකවරණය ඇයම දැඩිව ප්‍රතික්ෂේප කරනවා. මෙය පියාගේ නොමඳ සතුටට හේතු වෙනවා. මේ අතර ඇය තම උසස් පාසලේ වෙනත් යෙහෙලියක් සමග ගැහැනු දරුවකුට නොමනා සම්බන්ධයක් පවත්වාගෙන යන බව ගුරුවරුන්ට වැටහෙනවා. මේ ගුරුවරුන් ඇයව ප්‍රසිද්ධියේ මේ ගැන විවේචනය කරනවා. මින් සිදු වෙන්නේ ඇය තම පාසැල තුලත් නොසලකා හැරීමට භාජනය වීම.

මේ තරුණිය ඉන් ඇතිවන තම කාන්සිය කොන් කිරීම වෛරය පිට කර ගන්නේ පාරතොටේදී ඇයට හමුවන පිරිමි ලමයෙක්ගෙන්. අවස්ථාවෙන් ප්‍රයෝජන ගන්නා මේ පිරිමි ලමයා ඔවුන් හමු වූදෙවනි දිනම ලාභ කාමරයකදී ඇගේ යෞවනය බිලි ගන්නවා. ඇයට ඒ ගැන හැඟීමක් නැහැ. මේ සිදු වීම ගැන නොමේරූ තරුණිය සිතන්නේ ඇය ඇගේ මවගෙන් හොදටම පලිගත්තා යන අරුතෙන්.

කෙසේ හෝ මැය අතින් අත යන විට පියාට දැන ගන්නට ලැබෙනවා. ඉන් පසුවයි මේ යුවලට දැන් තමන් වැටී සිටින අපහසුව අමාරුව ගැන ඇස් අරෙන්නේ.

වෛද්‍ය ප්‍රතිකාර මඟින් තරුණියගේ සිතේ ඇතිව තිබූ වෛරී හැගීම් ඉවත් කලත්, ඇයව තව දුරටත් මේ රටේ තබාගෙන සිටීම ඉතාම අපහසු බැවින් දැන් ඇයත්, ඇගේ මවත් ඇතුලු මුළු පවුලම වෙසෙන්නේ ආසියානු කලාපයේම වෙනත් රටක.

විනිශ්චය ඔබයි.....

වරද කාගෙද??????

Monday, October 24, 2011

කථා දෙකක්, අඬන්නද? හිනා වෙන්නද?

මම අද මේ කියන කථාව මම සාමාන්‍යයෙන් මෙතෙක් නොකී ජාතියේ එකක්. හැබැයි මම මේක කියන්නේ ඔබව පිනවන්න නෙමෙයි. මේ කථාවේ යටින් තිබෙන මහා ඛේදවාචකය ගැන හිතන්න. නමුත් මින් විනෝදයකුත් ලැබෙනවා.

අපි බොහෝ විට අන්ධ මනුෂ්‍යයෙක්, කොර පුද්ගලයෙක් එහෙමත් නැත්නම් ආබාධිතයෙක් දැක්කම අනේ අපොයි කියලා හිතනවා. හැබැයි අපිට හිතෙනවද මේ මිනිසාටත් අපි වගේම අයිතිවාසිකම් තිබෙනවා කියලා?

කොටින්ම පවුලක් වෙලා දරුවන් හදාගෙන ජීවත් වීමේ අයිතිය මොවුන්ටත් තියෙනවා කියලා අපි හිතනවද?


මම ඔබට මුල් කථාවට පෙර තව කථාවක් කියන්නම්. දැන් මේක මතක් වුනේ.
එක් දිනක් මගේ ලඟට පැමිණියා එක්තරා කාන්තාවක්. ඇය දරුවන් නොමැති අයෙක්. හැබැයි ඇගේ ස්වරූපය ඉතාමත් නිරෝගී. මම ඇයට දිනයක් ලබා දීල නැවතත් මාව හමු වීමට, වෛද්‍ය වාර්ථා කීපයක්ම ලියා දුන්නා නැවත එනවිට අමතක නොකර රැගෙන එන ලෙස.
මේ කාන්තාව පැමිණියේ තම මව සහ සොයුරිය සමග. මා ඇයට උපදෙස් දුන්නා නැවත එනවිට ස්වාමි පුරුෂයා අනිවාර්‍ය‍යෙන්ම එක්කරගෙන පැමිණිය යුතුයි කියා. ඇය එයට හිස වනා පිලිගත්තා.

දින කීපයක් යනවිට මට මේ කථාව අමතක වුනා. හදිසියේම දිනක් මගේ සේවක මහතෙක් මට දැණුම් දුන්නා යම් රෝගියෙක් පැමිණ සිටිනවා ඔහුට ඇවිදීමේ අපහසුවක් ඇති නිසා ඔහු පැමිණි වාහනයට ගොස් රෝගියා පරීක්ෂා කරන්න වන බව. ඒ අනුව මම ඔහුගේ වාහනයට ගියා.

ඔබට කියන්න ඔහුට දෙපයම නැහැ. මගේ හිත කඩා වැටුනා ඔහු දැක්කම. ඉතාම නිරෝගී තරුණයෙක්. යුද්ධය දරුණු අවධියේ බිම් බොම්බයකට හසු වී ඔහුට තම දෙපා අහිමි වෙලා. ඉනෙන් පහලට දෙපා යාන්තමට සලකුනක් පමනක් ඉතිරි වෙන්න කපා දමලා. ඒ වෙලාවේ ඔහුගේ ජීවිතය බේරා ගැනීමට ඔහුගේ වෛද්‍යවරුන්ට කල හැකිව තිබූ උපරිමය ඔවුන් කරලා.

මෙහි තිබෙන අනුවේදණීයම කොටස මේක නෙමෙයි. ඇය ඔහුගේ පෙම්වතිය. පසැල් පෙම්වතිය. ඇය ඔහුට පිටු නොපා ඔහුත් සමග විවාහ වී දැන් දරුවකුත් සාදා ගන්නයි ඇගේ වෑයම. අවාසනාවට ඔහුට ස්වභාවික ක්‍රමයකට දරුවන් ලබා දීමට තබා අබුසැමි හැසිරීමකවත් යෙදීමේ හැකියාව නැහැ.

අපිට, මගේ ගුරුතුමා වන බටහිර වෛද්‍යවරයෙක් ඇතුලු වෛද්‍ය කණ්ඩායමක උත්සාහයේ ප්‍රතිඵලයක් ලෙස ඇයට කෘතිමව දරු ගැබක් ඇති කරවීමට හැකියාව ලැබුනා. ඒ දරුවා අර ශ්‍රේෂ්ට මවගේත්, එම වීර පියාගේත් දරුවකු වීම මම නම් හිතන්නේ මගේ ජීවිතයේ මම කල ඉහලම දෙයක්.
________________________________________________

කෙසේ හෝ මම කියන්න ආව කථාව මේක නෙමෙයි.

මගේ හොදම මිතුරෙක් මේ කථාව මට කිව්වේ. ඔහුටම සිදු වූවක් නිසා මම විශ්වාස කරනවා.

මේ මිත්‍රයා කොළඹට ආසන්න මම ජීවත්වන නගරයේම ජීවත්වන අයෙක්. මොහු මට වඩා කල් මෙහි ජීවත් වී තිබෙනවා. කොටින්ම මම මාතර සිට මෙතනට කඩා පාත් වූවෙක් වන අතර ඔහුගේ උපන් ගම මේක.

දැන් කලකට කලින් මෙගම ජීවත් වුනාලු නීරෝගී දුප්පත් යුවලක්. අවාසනාවට ඔවුනට ඉපදී තිබෙන දරු දෙදෙනාගෙන් වැඩිමලාට උපතින්ම කථා කිරීමේ හැකියාව නැති ගොළු බිහිරි දරුවෙක්. මොවුන් මේ දරුවා අනෙකාට මෙන්ම හොදින් උගන්වා යම් දෑතේ රැකියාවකට යොමු කර තිබෙනවා. අනෙක් තරුණයා මෙන් නොව මොහු ඉතාම ගුණ ගරුක අහිංසකයෙක්ලු. අර බාල සහෝදරයා කාලයාගේ ඇවෑමෙන් විවාහයක් සිදු කරගෙන වෙනම පදිංචියට ගොස් තිබෙනවා.

දිනක් මේ බාලයා තමාගේ ගැප්බර බිරිදත් සමග මව පියා බැලීමට පැමිණියාලු. මේ වන විට පිටතින් බලන කෙනෙක්ට මේ කාන්තාව ගැබිණියක් බව පේන තරමට ගැබ මෝරා ඇතිකාලය.

මේ යුවල දැකි විගස ගොළු තරුණයාට යක්ෂ සේනාපතියා හිසට ආරූඩ වී, පලමුවෙන් තම බාල සහෝදරයාට පහර දී ඔහුගේ බිරිදත් සමග නිවසින් පන්නා දැමුවාලු. දැන් මෙතන එකම යුද්ධයක් මොහු හස්ත මුද්‍රාවෙන් යමක කියමින් මවට සහ පියාට පහර දෙනවාලු.

මෙන්න මේ අවස්ථාවේ තමයි මගේ මිත්‍රයා මෙතැනට පැමිණ ඇත්තේ. ඔහු පලාතේ යම් පිලිගැනීමක් ඇති අයෙක් නිසා ඔහුට හැකියාවක් ලැබුනලු මේ තරුණයාව පාලනයට ගන්න. ඒ තරුණයා මගේ මිත්‍රයාටත් අර මුද්‍රාබසම දෙසනවාලු. හැබැයි මගේ මිතුරාට මෙලෝදෙයක් තේරෙන්න නැතිලු. පසුව ඔහු මොහුත් සමග ගොස් තිබෙනවා ඔහුගේත් මිතුරෙක් වන මේ තරුණයාගේ ගුරුවරයෙක් හමුවට.

මෙන්න ගුරුතුමා කී කථාව…….

"මොහු කියනවා මොහුගේ මල්ලි බිරිදක් අරගෙන දැන් දරුවො හම්බ වෙන්නත් එනවා. මගේ මව්පියෝ කසාද බැදලා ඔවුන්ටත් අපි හම්බු වුනා. ඇයි මට විතරක් එහෙම කරන්න බැරි?"

ඔහු මේ හස්ත මුද්‍රාවෙන් පෙන්වා තිබෙන්නේ අපේ ඔබා අයියගේ කොන්දොස්තර මහත්තයා පෙන්නපු දේමයි...

Tuesday, October 18, 2011

කුමන්ත්‍රනය.

මේක දැණුමක් ගන්න ලියන දෙයක් නෙමේ. මම මේ සිද්ධිය කියන්න හිතුවේ හැමදාම එකම වගේ කථා කියලා ටිකක් වෙනසකට. මේ සිද්ධිය වුනේ මම උ/පෙ කරලා ගෙදර ඉන්න දවස්වල. මේ කාලේ අපේ සඳරූ වගේ මරණ ගෙවල්, මගුල් ගෙවල්, පොලියට ගන්න කාලේ.

එක දවසක් මහ රෑ අපේ මිත්‍රයෙක් මගේ කාමරේ ජනේලෙට තට්ටු කරනවා. දැන් වෙලාව රෑ 10 ට විතර. ඒ කාලේ මම හිටියේ ගෙදරින් එලියට දොරක් තිබුනු පරණ තාලේ කන්තෝරු කාමරේ. (මහා භීෂණයත් එක්කම මට මේ කාමරේට සමු දෙන්න වුනා මවගේ බලවත් ඇවිටිල්ල නිසා.) ඉක්මනට මිත්‍රයා කාමරේට අරගෙන කථා කලහම අපේ යාළුවෙක්ගේ අම්මා නැතිවෙලා. මේයා ගැනත් කියන්න තියනවා. ඉතාම ඉහලට ඉගෙනගෙන ඒත් දැන් බොගම්බර හිරගෙදර සිරබත් කන යාළුවෙක්. මොකද මිනිහා සක්විතිගේ දෙවනි සක්විති වෙන්න ගිහින් එහාට යන්න වුනේ.

අම්මටවත් කියන්නැතුව මමත් මගේ පලමු මිත්‍රයත් මේ මලගෙදර ගියා. යනකොට අපේ මිත්‍රයෝ කීප දෙනෙක්ම එතැන. මේ කට්ටිය ගැන කියනවනම් හැමෝම වෙන්න දොස්තරලා, නැත්නම් වෙන්න ඉංජිනේරුවො, එහෙමත් නැත්නම් වෙන්න එකවුන්ටන්ස්ලා, ඔය වගේ මහජාතියේ අය තමයි හිටියේ. දැන මලගේ නැගලා යනවා. කථාබස්, හපන්කම්, පුරසාරම්, බැලුවම වැඩි හරියක් මෝඩකම්. මේ වගේ තැන්වලට අපේ නඩේ ගියාම ඔය සඳරූ කියනව වගේ ගමේ කාණ්ඩ දෙකක් ඇති වෙනවා. අර වෙන්න මහජාතියේ අයයි, ගමේ බයියෝ ටිකයි. මේ දෙගොල්ලොම වැඩ පෙන්නනවා. පොඩි තරගයකුත් මේ අය අතර තිබෙනවා එදා ඉදලම.

එදාත් සුපුරුදු පරිදි මේ තරගය ඉස්මතු වුනා. ඒකෙ පොඩි සාධාරනයකුත් තිබ්බා. ඇයි මේ මලගෙදර හැම වැඩේම කරන්නේ අර කොල්ලො ටික. අපේ උන් කයිය ගහනවා විතරයි. ඒත් වැඩි සැලකිල්ල අපිට. කැරම් ගැහුවත්, කාඩ් ගැහුවත් උන් දිනුම්. අපේ උන්ට හෙන තරහයි. අපේ කට්ටිය කථා වෙනවා. උ/පෙ ගැන කැම්පස් ගැන, කෙල්ලොත් අපේ උන්ට වැඩි සපෝට්.

මේ අතරේ ගමේ කට්ටිය අපිට කතන්දර කියනවා, හොල්මන් ගැන, අද්භූත දේවල් ගැන නා නාප්‍රකාර දේවල්. අපි බය වෙනවද එහෙම. පාඩම කරලා ඇටකටු උඩ නිදිය ගත්ත අපි?

මේ කාලේ අපේ ගමේ පංසලේ නායක හාමුදුරුවෝ අපවත් වෙලා මාස තුන ගෙවිලත් නැහැ. මේ ආදාහනය තිබ්බේ මෙතුමා ජීවිත කාලෙම මහන්සි වෙලා හදාපු පාසලේ පිට්ටනියේ. දැන්නම් මේක මහා විද්‍යාලයක්.

ගමේ කොල්ලො අපිට කියනවා. මේ නායක හාමුදුරුවෝ අර පාසල දාල යන්නේ නැහැලු. රෑට රෑට එතැන හොල්මං කරනවලු. මුන් අපිට මේක බලන්න යන්න කථා කරනවා. අපේ කට්ටියත් ටිකක් දැන් ගැස්සිලා ඒත් මේකට මුහුණ නුදුන්නොත් ගමේ ඉඳලා ඉවරයි. ඒ නිසා අපි තීරණය කලා බලන්න යන්න.

ඒත් වැඩේ කියන්නේ ගමේ කොල්ලො බයයි හොල්මන් වලට. පලවෙනි පාරම අපි දිනුම්. අපේ කට්ටිය දැන ෆුල් ෆෝම්. අද හොල්මන අල්ලන්නම තමයි යන්නේ. අපි ගියා මට මතක හැටියට 10 වැඩි පිරිසක්. තව ගමේ හිටිය නිර්භීතම කොල්ලො තුන් දෙනයි. ඔන්න ගමක හැටි. මෙච්චරයි නියම පුරුෂ ධෛර්ය්‍යය තිබ්බ කොල්ලො හිටියේ.

අපි දැන් ගජබා රජතුමා මුහුද දෙබෑකරගෙන ඉන්දියාව අල්ලන්න යනවා වගේ ඉස්කෝල වත්තට යනවා. මුලින්ම යන්නෙ, දැන් ඇත්තටම දොස්තර කෙනෙක් වෙච්චි මගේ අතීසාර මිත්‍රයෙක්. ඊලගට තව කීප දෙනෙක්. මම ඇතුළු ටිකක් බය අය දෙතුන් දෙනෙක් අන්තිමට. අර ඇත්ත දොස්තරයි ගමේ කොල්ලො තුන් දෙනයි අපිට හොල්මන ඉතුරු කරන පාටක් නැහැ. අපි පස්සෙ කෑල්ලක් හරි කඩා ගන්නව කියලා හිතලා හිමීට යනවා.

මේ පාසැල වත්තට තාප්පයක් නැහැ. තියන්නේ කටුකම්බි වැටක්. ඒකත් හරියට අඟල් 8 විතර පරතරයක් තියලා ගහපු අලුත් වැටක්. මේක තරණය කරන්නේ ගමේ කොල්ලන්ගේ උදව් ඇතුව. උන්නේ දන්නේ උන් දවල්ට පනින තැන්.

ඔන්න දැන් අපි වත්තේ, කට්ටිය ටික ටික ලංවෙනවා. අපි අන්තිම දෙතුන් දෙනා අතුත් අල්ලගෙන. මුලින්ම ගිය හතර දෙනා දැන් දෙවනි පෙලත් එක්ක එකතු වෙලා. කිසිම දෙයක් පෙන්න නැහැ. කථාව බොහොම හිමින්. ඇයි හොල්මන පැනලා ගියොත්,

මෙහෙම ගෙවුන කාලය අදටත් මට මතක නැහැ. විනාඩි 05, 10, 20 වෙන්නත් පුලුවන්. හැබැයි මට මතක හැටියට අපි මහා කලයක් බලන් හිටියා. ඒක අවුරුද්දක් දෙකක් විතර. මොන මගුලකට මේකට ආවද කියලමයි හිත කියන්නේ.


එක පාරටම අර නිර්භීතම තුන් දෙනා නැගිට්ටා, දැන් දුවනවා, මෙහෙම කියාගෙන "ඔන්න හාමුදුරුවො ඉස්සරහා" සහතික ඇත්ත මම බැලුවා මෙන්න ඉන්නවා හාමුදුරුවෝ අපිට ටිකක් ඉදිරියෙන්. දැන් කට්ටිය ආපහු දුවනවා. එච්චරයි මට මතක.

ටිකකින් ඇහෙනවා. එකෙක් කියනවා මචන් මගේ කන්නාඩිය නැහැ ඒක වැටුනා කියලා. දැන් අපිට නවතින්නම වෙනවා. බලනකොට නැවතුනේ අර මුලින්ම, අන්තිමටම ගිය දෙතුන් දෙනා විතරයි. අනිත් උන් දුවනවා ඇහෙනවා පේන්නේ නැහැ. යන්තම් විලාප ගහලා කට්ටිය නවත්තගෙන බැලුවම අපි දැන් මේ ඉන්නේ අර කම්බි වැටත් පැනලා. මට අදටත් මතක නැහැ මේක තරණය කරපු හැටි.

අපි මේ සියළුම දෙනා අර ගමේ තුන් දෙනා ඇතුළු නඩය සියළුම නැති වූ භාන්ඩ සෙරෙප්පු ආදිය හොයාගෙන මේක කාටවත් කියන් නැහැ කියලා පොරොන්දු වෙලා ආපහු ආවා මල ගෙදරට. මෙතන කිසි කෙනෙක් දන්නේ නැහැ මේ කථාව. අපි අර කොල්ලො තුන් දෙනාට හෙනට සලකනවා ඇයි බයයිනේ මුන් කිව්වොත් ?

ටික වෙලාවකින් ඔන්න තේ, කෝපි එහෙම එනවා, ගමේ උන් අපිට මේවා පෝලිමට ගේනවා " මහන්සි ඇතිනේ මහත්තුරු දුවලා" කිය කියා.

මොක වුනත් වැඩේ දෙල් බව අපිට තේරුනා. වෙලා තියන්නේ මහා කුමන්ත්‍රණයක්. උන් ප්ලෑන් කරලා තමයි අපිට අර ගේම සෙට් කරලා තියන්නේ. අපි ආවට පස්සේ කට්ටියක් වෙනම ගිහින් උන් තමයි හාමුදුරුවොන්ට රගපාල තියන්නේ.


එදායින් පස්සේ අපි මල ගෙවල් වල යාම සෑහෙන්න අඩු කලා.

Monday, October 17, 2011

අනතුරු ඇඟවීමයි!

කාලෙකට පස්සේ හිතුනා මගේ අත්දැකීමක් කොටලා දාන්න. මේ ගැන මට අදහසක් ආවේ ඊයේ පෙරේද කොරියානු භාෂා ප්‍රවීණතා විභාගය පැවැත්වූ නිසයි.

මම ඔබට දැන් ටික කලක සිට වරින් වර මඳසරුභාවය ගැන එහෙමත් නැත්නම් දරුවන් ලබා ගැනීමේ අපහසුතා ගැන ලියනවා. මේ ගැන ලියන්න මාව පොලඹවන්නේ මගේ රෝගීන්. ඒ කියන්නේ සමහර රෝගීන්ගේ අත්දැකීම මට හිතෙනවා සමාජයට වැඩක් ඇති වෙයි කියලා. මේ නිසයි අද මම මේ ගැන ලියන්න හිතා ගත්තේ.

මේ ලිපි ලිවීමේදී මේ අයගේ අනන්‍යතාවයන්ට කිසිම හානියක් වෙන දෙයක් මම ලියන්නැහැ. ඒ වගේම මෙයාල සිටි රටවල් මම ලියන්නේත් නැහැ. තරුණයන් අතර කොරියානු භාෂා විභාගය ගැන තියෙන උනන්දුව නිසා තමයි මේ කථා මට මතක් වුනේ. මෙතැන කථා තුනක් තියනවා. ඒ වෙන වෙන කාලවල වෙනස්ම රටවල් තුනකදි අපේ තරුනයන් තුන් දෙනෙකට මුහුන පාන්න වුනු ඛෙදජනක සිද්ධීන් තුනක්. මේවා කියවලා යම් අදහසක් හිතට ගන්න කියා මම ඔබෙන් ඉල්ලනවා.

පලමුවැනි කථාව.
මේ තරුණයා බොහෝම කාලෙකට කලින් නීති විරෝධී විදියට යුරෝපා රටකට ඇතුල් වුනා. නමුත් මේ කාලේ ලංකාවේ තිබුනු ප්‍රශ්න ප්‍රයෝජනයට අරන් තමන්ගේ ගමේ නම කියපු ගමන් පිටුවහල් නොකර කෑම්ප් දාලා.

මේ පුද්ගලයා අසුවෙනකොට මොහු ඉදලා තියන්නේ කළු අප්‍රිකානුවන් පිරිසක් සමග. එම රටේ පොලීසිය මොවුන් සියල්ලන්ටම යම් කිසි එන්නතක් ලබාදීල තිබෙනවා. මේ එන්නත දීල තියන්නේ මොවුන්ගේ ඉකිලිය ප්‍රදේශයට. ඉතාම දැඩි වේදනාවක් ඇති වෙලා තියනවා. දින කීපයක් ඇවිදීමට පවා අපහසු තත්වයක් තිබිලා තියෙනවා.

නමුත් කොහොම හරි මේ පුද්ගලයා තමන්ගේ අසරණභාවය පෙන්වා දීල මේ රටේම සෑහෙන කාලයක් ඉදලා ලංකාවේ පදිංචියට පැමිණ, කුඩා ව්‍යාපාරයක් ඇරබුවා.

ඇත්තෙනම මට මොහු හමුවන විට විවාහ වී යම් තරමක සාර්ථක ව්‍යාපාරිකයෙක්. නමුත් ඒ වන විට ඔවුන්ට දරුවන් නැහැ. සොයා බැලීමේදී හෙලි වුනේ ඔහුගේ වෘෂන කෝෂ ශුක්‍රාණු නිපදවන්නේ නැති බවයි. අවසාන වශයෙන් කරන ලද ශල්‍ය කරමයකින් හා බයොප්සි පරීක්ෂණ කීපයකින්ම තහරු වූයේ ඔහුගේ වෘෂණ තුල ඇති සියලුම ව්‍යහයන් සිතාගත නොහැකි අයුරින් විනාශ වී ඇති බවයි. කිසිම ලෙඩ දුකක් ඇති වී නැති මේ පුද්ගලයා තදින් විශ්වාස කරනවා මේ සියලුම හානි ඔහුට සිදු වූයේ අර එන්නත නිසා බව. නමුත් අපට පැහැදිලි යමක් ප්‍රකාශ කල නොහැක්කේ පිලිගත හැකි විද්‍යාත්මක සාක්ෂි අප සතුව නැති නිසායි.

දෙවනි කථාව
මේ තරුණයා ඉතාමත් මහන්සියෙන් නීත්‍යාණුකූල මාරගයෙන් යුරෝපා රටකට පැමිණෙන්නේ මීට වසර ගනනාවකට පෙරයි. එහිදී ඔහුට නොසිතූ වාසනාවක් කඩා වැටෙනවා. පහසු රැකියාවක් විශාල වැටුපකට. මේ රැකියාව තමයි ඊයම් කූරු නිපදවන වැඩපලක ඊයම් උනුකරන යන්ත්‍රය ක්‍රියාත්මක කිරීම. මොහුට මේ සදහා විශාල වැටුපක් ලැබුනා.

මේ අතර වසර ගන්නකින් මොහු මෙම රටේදීම දැන හදුනා ගත් ශ්‍රී ලාංකික යුවතියක් හා විවාහ වුනා. ප්‍රතිඵලය පෙර කථාව පරිදිමයි. දරුවන් නැහැ. පසුව එම රටේ වෛද්‍යවරුන් සොයා ගත්තා මොහුගේ රුධිරයේ විශාල වශයෙන් ඊයම් අන්තර්ගත බව. ඒ නිසා එම ආයතනය මගින් පෙර වැටුපම මොහුට ගෙවමින් වෙනත් සුලු රැකියාවකට මාරු කලා. නමුත් දරුවන් සෑදීම අපහසුයි කියන එක තමයි මේ රටේ වෛද්‍ය මතය වුනේ.

කෙසේ හෝ නිවාඩුවකට පැමිණි අවස්ථාවක ආයූර්වේද වෛද්‍ය ප්‍රතිකාර වලට යොමු වීමෙන් සීග්‍ර ලෙස රුධිරයේ ඊයම් ප්‍රතිශතය අඩු වී ගියා පමණක් නෙමෙයි මොහුගේ නිසරුභාවයත් නැති වී ගියා. අද එක් දරු පියෙක්, රැකියාව තවමත් එම රටේ එම ආයතනයේමයි. වෙනත් සැහැල්ලු රැකියාවක්.

තෙවනි කථාව
මෙම තරුණයාත් නීත්‍යාණුකූල මගින් යම් රටකට රැකියාව සඳහා යනවා. වසර 10 අධික කාලයක් රැකියාව කර ලංකාවට එනවා. මෙහිදී යුවතියක් හා විවාහ වෙනවා. මොහුටත් දරුවන් නැහැ.

හෙතුව පුරුෂ මඳ සරුභාවය. සිදු වී ඇත්තේ මොහු රැකියාව ලෙස මෙම රටේදී කර ඇත්තේ, ගෘහභාන්ඩ නිපදවන කම්හලක එම ගෘහ භාන්ඩ ඔප දැමීම. මෙහිදී ඔහුට හානි වී ඇති ආකාර දෙකක් හදුනා ගත හැකියි.
1. එම රසායනිකයන් ආඝානය වීම.
2. ඔප දැමූ භාන්ඩ නැවතත් වියලි බව ඇති කරවීමට යම් මට්ටමකට රත් කරනවා. එම රත් කිරීමේදී එම ස්ථානයේ උෂ්ණත්වය ඉතා අධිකව ඉහල යනවා. මෙන්න මේ ආකාර දෙකින්ම මේ පුද්ගලයාට හානි වී තිබෙනවා.
කෙසේ හෝ මොහු මේ වන විට තරමක සාර්ථක භාවයක් ඖෂධ වලින් ලබා ගනිමින් සිටිනවා.

මේ කථාවන් තුන ඉතාමත් කෙටියෙන් ඔබට කියන්නට මම සිතුවේ මින් ලබාගත හැකි ආදර්ශය නිසායි. අපි හැම කෙනෙක්ටම මුදලක් උපයා ගැනීමේ අවශ්‍යතාවක් තිබෙනවා. එය අපේ අයිතියක්. නමුත් අපේ රටේ දැන් තිබෙන තත්වය අනුව ජීවන වියදම හමුවේ තරුණයන් මෙවැනි තීරන ගන්නවා.

මම කියන්නේ මෙවැනි තීරන ගනිද්දි ඉතා කල්පනාකාරී වන්න.

යම් දෙයක් වූ පසුව එයට විසදුම් සොයනවාට වඩා හානියක් නොකරගෙන සිටීම වැදගත් බවයි මගේ හැගීම.

මේ ගැන නැවත නැවතත් සිතන්න.

Friday, October 14, 2011

හාවගෙයි ඉබ්බගෙයි රේස් එක සහ ආයූර්වේදය නොනැසී පැවතීම.

සෞක්‍ය අමාත්‍යාංශය සහ ඒ හා සම්බන්ධ විවිධ සංඛාන තොරතුරු.

දේශීය වෛද්‍ය අමාත්‍යාංශය සහ ඒ හා සම්බන්ධ විවිධ සංඛාන තොරතුරු.

(1) PATIENT STATISTICS UNDER CENTRAL GOVERNMENT  AYURVEDA HELTHCARE CENTERS

1. Ayurveda Hospitals - 07
2.Dispeansary - 01
3.Beds - 523

(2) PATIENT STATISTICS UNDER PROVINCIAL COUNCILS  AYURVEDA HELTHCARE CENTERS

1. Ayurveda Hospitals - 62
2.Dispeansary - 208
3.Beds - 3102

Total
Hospitals - 69
Dispensary - 209
Beds - 3625

(3) Number of Hea lth Institutions and Beds by Type, 2007 (Annual Health Statistics)
1 Teaching Hospitals - 16
Beds - 18451
2 Provincial/ General Hospitals - 12
Beds - 7799
3 Base or District Base Hospitals - 44
Beds - 12391
4 District Hospitals - 161
Beds - 14417
5 Peripheral Units - 95
Beds - 5127
6 Rural or Estate Hospitals - 182
Beds - 5180
7 Cen. Disp. & Mat. Homes - 59
Beds - 596
8 Other Health institutes - 46
Beds - 4733

Total Hospitals - 615
Beds - 68694


අද මම ඔබට කියන්නේ ඔබ මවිත වන දෙයක්. දැන් ටික දිනක පටන් වෙදගෙදරින් ආයූර්වේදය ගැන නොයෙක් දේ ඔබ සමග කථා කලා. ඒ සෑම විටකදීම මට වැටහුන දෙයක් තමයි ඔබ සැම මේ ආයූර්වේදයට යම් කැමැත්තක් තිබෙන අය බව. ඒ එසේ වුවත් ඔබ යම් අපැහැදීමක් තිබෙන බව මේ විද්‍යාව යම් තරමකටවත් දියුණු නොකිරීම පිළිබඳව.

අද මගේ මේ සාකච්ඡාවේ තවත් එක් පියවරක් විදියට වර්ථමාන ආයූර්වේදය මුහුණ දීල තියන විශාලම ප්‍රශ්නය තමයි කතා කරන්නේ.

ලෝකයේ පලමුවැනි සංවිධානාත්මක රෝහල සෑදුවේ මම දන්න තරමින් දප්පුල රජතුමා අනුරාධපුර යුගයේදී. අදත් නටබුන් විදියට මිහින්තලේ තිබෙන්නේ ඒ රෝහල තමයි.

මේ රෝහල් සංකල්පය ලෝකයට අපි දුන්නේ ඒ තරම් ඈත අතීතයේදීයි. මේක දියුණුවෙමින් නොයෙක් අත පැතිරුනා. මම නම් හිතන්නේ ලෝකයේම මේ සංකල්පය පැතිරුනේ මෙතනින්. වසභ රජතුමාගේ කාලේ, (ඒත් අනුරාධපුර යුගයේ), අපිට පුළුවන් වුනා නම් රෝමයට තානාපති කෙනෙක් යවන්න, මේවැනි දෙවල් පැතිරීම ගැන අපි කථාකල යුතු නැහැ නේද?

මේ විදියට යුගයෙන් යුගය ආයූර්වේදය දියුණු වෙමින් පිරිහෙමින් පැමිණියා.

ආයූර්වේදයේ පිරිහීම ඌව වෙල්ලස්ස කැරැල්ලෙ පරාජයෙන් පසු 100% ස්ථාවර වෙනවා. ඒ ගැන වෙනම කථාකලයුතු දෙයක්.

කෙසේ හෝ මේ පිරිහීම කොතෙක් වුවත් (දින වකවානු අමතකයි ) වද කහ සුදිය තමයි ආයූර්වේදෙට මෑත යුගයේ විනය කැටපු ප්‍රධානම සාධකය වුනේ. නමුත් එම සංසිද්ධියට ආයූර්වේදයේ සම්භන්ධයක් නැහැ. ඒක වෙනම කථාවක්. ඒත් ඒ කන්ඩායමේ ආයූර්වේද වෛද්‍යවරුත් ඉදලා තිබෙනවා.

මේ මොන බාධක පැමිණියත් 1970 දශකය වනතෙක් රටේ ප්‍රධාන වෛද්‍ය ක්‍රමය වී තිබෙන්නේ ආයූර්වේදය. 1970 පමණ වනවිට ඇති වූ නව ලෝක ප්‍රවණතා, හා සමාජ ආර්ථික කරුනුවල බලපෑම, ඒ වගේම නව යටත් විජිත ව්‍යාප්තිය, වගේ සාධක ආයූර්වේදයේ තිබූ අසන්විධානාත්මක බව, විද්වත් භාවයේ තිබුනු පිරිහීම, වැනි කාරනාත් එක්ක මේ පිරිහීම බින්දුවටම වැටුනා කිව්වොත් මම හරි.

මම දන්න තරමින් 1929 විතර සිට තමයි නීතියෙන් ආයූර්වේදයට කෙනෙහිලි පටන් ගන්නේ. ඒ සුද්දන්ගේ කාලේ ඇති කරන නව සෞක්‍ය අන පනත් හරහා.

කෙසේ හෝ මම ඔබට පැහැදිලි සත්‍යයක් කියන්නම්,

"මේ අණ පනත්වල හැටියට මමද නීති විරෝධී වෛද්‍යවරයෙක්"

ඇයි මම එහෙම කියන්නේ, ලංකාවේ තාම නීතියෙන් ආයූර්වේද වෛද්‍ය ක්‍රමය පිලිගැනෙන්නේ නැහැ. අර සුද්ද ඇති කරපු සමහර නීති තාමත් එහෙමම තිබෙනවා. යම් යම් චක්‍රලේඛන සහ පනත් මඟින් යම් බලතල ඇතිව ආයූර්වේද අමාත්‍යාංශයක් පිහිටුවා තිබුනත් එතැන මේ නීති නිසා ඇති වී තිබෙන්නේ මහ අවුල් බවක්.

මම ඔබට එක් උදාහරනයක් දෙන්නම්……..

1960 ගනන් වලදී පලමුවෙන්ම ලංකාවේ ආන්ඩුව ඇතිකලා ආයූර්වේද දෙපාර්තමේන්තුවක්. එම ආයතනය 1962 ආයූර්වේද පනත මගින් තමයි ස්ථාපිත කලේ. නමුත් ජේ. ආර්. ජයවර්ධන යුගයේ ආයූර්වේද අමාත්‍යාංශයක් ඇති කලේ එසේ නොවෙයි. මේ නිසා අද මේ දෙපාර්තමේන්තුවද වඩා බලවත් එසේත් නැත්නම් අමාත්‍යාංශයද වඩා බලවත්, (කිකිලිද බිත්තරේද) වැනි කබ ඇදිල්ලක් ඇති වී තිබෙනවා.

නිසි පනතකින් නෙමෙයි මේ ආයූර්වේද වෛද්‍යවිද්‍යාවට මෙතෙක් නීතිමය රැකවරණය සලසන්නේ. තිබෙන පනත සංශෝධනය කර නැවතත් ආයූර්වේදයට තමන්ගේ හැකියාවෙන් නැගී සිටීමේ තත්වය ඇති කලොත් කිසිම අමාත්‍යාංශයක් මෙයට අවශ්‍ය නැහැ. සෞක්‍ය අමාත්‍යාංශයේම දෙපාර්තමේන්තුවක් බවට පත් වුවත් ඇති.

මේ නිසා සමාජමය වශයෙන් වෛද්‍යවරයාට අහිමිවන දේ බොහෝමයි. කොටින්ම අද ආයූර්වේද වෛද්‍යවරයාට තමන්ගේ රෝගියා වෙනුවෙන් වෛද්‍ය සහතිකයක් නිකුත් කල නොහැකියි. රක්ෂණ සහතිකයක් සඳහා ආයූර්වේද වෛද්‍ය සහතික වලංගු නැහැ. ( මා ඇතුළු කීප දෙනෙකුට මේ වරප්‍රසාද ලැබෙන අතර ඒ නීතියෙන් නෙමෙයි. අපේ කටේ හයියට සහ අපි වෙනුවෙන් කථා කරන්න මිනිසුන් සිටින නිසා. නමුත් නීතිමය රාමුවක් නැහැ.) වෙනරටකට අපේ ඖෂධයක් යවා ගන්න බැහැ. (ඒකත් මට නම් සුළු දෙයක්.) නමුත් මේ ප්‍රශ්න ආයූර්වේදයේ ප්‍රගමනයට විශාල ලෙස බලපානවා.

මම මේ කියන බනේ හරිවිදියට තේරුම යන්න සුළු උදාහරනයක් ගන්නම්. බලන්න ඉහත සටහනේ ඇති අංක 1, 2 සටහන්. මේ තිබෙන්නේ මේරටේ තිබෙන ආයූර්වේද රෝහල් ගනනත් ඒවායේ ඇති ඇදන් ගනනත්. අංක 3 සටහනේ දැක්වෙන්නේ මේ රටේ ඇති බටහිර රෝහල් ගනනත් ඇදන් ගනනත් දැක්වෙනවා. ඔබම සන්සන්දනය කරන්න. මම යම් උදව්වක් පමනක් කරන්නම්. හැම විටම විවේචකයා ඔබයි.

(මේකෙදි මම කියන්නේ ආයූර්වේදයත් මේ ගානට දියුණු කල යුතුයි කියලයි. නැතුව ආයූර්වේදය පමනක් තිබිය යුතුයි කියලා නෙමෙයි. අනෙක් රෝහල් ගනනත් මට හිතෙන හැටියට නම් හොදටම මදි.)

ආයූර්වේද රෝහල් ගනන - 69
ඩිස්පැන්සරි ගනන (රජයේ) - 209
රෝහී නේවාසික ඇදන් ගනන - 3102

ඒ අතරම බටහිර රෝහල් ගනන - (2007දී) 615
ඇදන් සංඛ්‍යාව - 68694

දැන් ඔබගේ තීරනය දෙන්න.........

Thursday, October 13, 2011

නවීන ලෝකෙට ආයූර්වේදයෙන් වැඩක් තිබෙනවද?

ටික දිනකින් වෙදගෙදරට ලියන්න මට නොහැකිවුනා. අද ඒ වෙනුවෙන් කාලයක් කැප කිරීමේ හැකියාව තිබෙනවා. මගේ අධ්‍යාපන වැඩ නිසා මම මේ දිනවල ඉතාමත් අවිවේකී. ඒ අතර සෑහෙන කාලයක් සිතාගෙන සිටි වැඩකුත් හදිසියෙම කරන්න සිදු වුනා.

දැන් මගේ වයස අවුරුදු 44 මේ කාලය පුරාවටම මම ඉතාම නිරෝගීව සිටියත්, එක පිට පැමිනි නොයෙක් ප්‍රශ්න නිසා මට සෑහෙන විවේකයක් අවශ්‍ය වී තිබුනේ දැන් ටික කලක සිට. මේ අවශ්‍යතාවය මට හොදින් දැනුනා. ඒ නිසා ගිය සතියේ අවසානයේ මම හදිසියේම තීරනය කලා රොහල්ගත වෙන්න. කිසිවකුට නොදන්වා, රෝහල් ගත වුනා. මම සිතාගෙන ගියේ විවේකීව සිටිනා දින ටික වටිනා විදියට ගත කරන්න ඕනෙ කියලා.

ඒ කියන්නේ සැලසුම් කරගෙන සිටි ලිපි කීපයක්වත් ලියා ගන්න සිතුවා. නමුත් එතැනදි මට දැනුනු කම්මැලිකම නිසා කිසිවක් කලේ නැහැ. බ්ලොග් කියවූවා. කමෙන්ට් දැම්මා. වෙන කිසිම ප්‍රයෝජනවත් වැඩක් කලේ නැහැ. රෝහලෙන් පිට වූ පසු තමයි තරු පෙනුනේ.

වෘත්තීය වැඩ, අධ්‍යාපන වැඩ, ඒ අස්සේ බ්ලොග් කර්මාන්තය සෑහෙන්න කඩා වැටිලා. රෝගීන්ට නම් ප්‍රශ්නයක් නොවෙන්න කලින් සැලසුම් කර තිබූ නිසා නැවත සේවයට පැමිනි විගස ඇතිවන තද බදය හැර වෙන කිසි ප්‍රශ්නයක් ඇති වන බවක් පෙනුනේ නැහැ. ඒත් අධ්‍යාපන වැඩ කඩා වැටිලා සෑහෙන්න අමාරුයි ගොඩ එන්න. මේ කාරණය නිසා මම ටික දිනක් ගතකලා ඒ වෙනුවෙන්. දැන් නම් එක පිලිවෙලක් තිබෙනවා. ඒ නිසා බ්ලොග් ව්‍යාපෘතියට ඇන්ටර් වෙන්න තමා මේ සූජානම.

අද මාතෘකාව තමයි නවීන ලෝකෙට ආයූර්වේදයෙන් වැඩක් තිබෙනවද?
ඇත්තෙන්ම මම මුලින්ම අයූර්වේදයට පැමිණි මුල්ම දිනවල මේ ප්‍රශ්නෙ සිතේ ඇතිවන හැම වෙලාවකම මගේ කොන්ද දිගේ විදුලි ධාරාවක් යනවා වගේ ගතියක් මට තිබුනා. මොකද කාගෙත් අකමැත්ත පිට මගේ වෙනත් විද්‍යා උපාධියක් හදාරන එක නවත්තල ආයුර්වේදෙට එන්නේ. හැබැයි මම තීරනය කලා ඒකට මුහුන දෙන්න. මගේ චරිත ස්වභාවය අනුව මම හැම වෙලේම කැමතියි අභියෝග වලට . මෙතැනදිත් මම තීරනය කලා මේ අභියෝගයට මුහුන දෙන්න……………...

අද ලෝකෙ ගත්තම බොහෝ රෝග තිබෙනවා කලින් නොතිබූ රෝග. අන්න එතැනදි කොහොමද මේ ආයූර්වේදයෙන් වැඩක් ගන්නේ?

මේ ප්‍රශ්නේ මට මෙන්ම ඔබටත් ඇති වෙනවා මම සිතන විදියට. ඒක එහෙම වෙන්න ඕනෙ.

ඇයි අපි තාම මේ වෛද්‍යක්‍රමය ගැන නියම විදියට දන්නේ නැහැ.

අපේ ජීවිත වලින් ආයූර්වේදෙ ඈතට ගිහින්.

දැන් ගන්න ඒඩ්ස් මම හිතනවා මේ රෝගයට නියම ප්‍රතිකාර සොයා ගන්න හොදම ක්‍රමය තමයි ආයූර්වේදය කියලා. හැබැයි එතනදිත් දේශීය වෛද්‍ය විද්‍යාව වඩා සුදුසුයි කියලා තමයි කියන්න වෙන්නේ. ඇයි මම එහෙම කියන්නේ?

මම ඔබට සුලු උදාහරනයක් දෙන්නම්. ඔබ දන්නවා ඇති ඉස්සර යම් යම් ඖෂධ පාවිච්චි කරන කොට අපි ගන්නවා අනුපාන කියලා දෙයක්, එහෙමත් නැත්නම් ගුලි ගන්නේ කුඩා ක්ෂායක් එක්ක. මේක මේ දේශීයවිද්‍ය විද්‍යාවේ පමණක් දැකිය හැකි විශේෂයක්. මෙකෙන් කෙරෙන්නේ අද අපි ප්‍රතිජීවකයක් ගන්නවා වගේ වැඩක්.

එතකොට බහුලවම ප්‍රයෝජනයට ගන්නා අනුපානයක් තමයි නෙල්ලි රසකිඳ කියන ශාඛ දෙකින් ලබා ගන්නා ක්ෂාය. (නෙල්ලි ගෙඩිත්, රසකිඳ වැලත් තමයි මේකෙදි වැදගත් වෙන්නේ.) මේ ක්ෂාය භාවිතා කල විට අපේ ප්‍රතිශක්තිය හොඳින් ඇති වෙනවා. ඒ නිසා ඒඩ්ස් වැනි රෝගයකට වැදගත් වෙනවා. මම මේ ගැන මීට කලිනුත් ලියා තිබෙනවා. එතකොට අපිට මේ ගැන ඇයි පර්යේෂණ කරන්න බැරි?

මම හිතනවා නිසි විශේෂඥයන් එකතුවෙලා පර්යේෂණයක් කලොත් ඉන් හොද ප්‍රතිඵල ලබාගත හැකි වෙනවා නිසැකවම. මේවා විතරක් නෙමෙයි, ඔබ දන්නවා සමහර ශාඛවල ඖෂධ සදහා ගන්න කියන්නේ දලු. ඇයි මේ දලු? මේවායේ දලු අවස්ථාවේ තිබෙන රසායනික උපාධානයන් ඉතා ඉහලයි. උද්භිද විද්‍යාව කරන කෙනෙක් ඒ ගැන කමෙන්ට් එකක් දමනවා නම් මම සතුටුයි.

කොහොම හරි දේශීය වෛද්‍යවිද්‍යාව කියන විෂය පර්යේෂණාත්මකව භාවිතා කලොත් අපිට විශාල සේවයක් ගත හැකියි. මම නම් දැණුම ගැන සිතන්නේ එක තැනක දැණුම පල්විය යුතුයි කියන මතයෙන් නෙමෙයි. දැණුම හැම වෙලේම හුවමාරු විය යුතුයි. එතකොටයි එම විෂයන් එකිනෙකින් ජනතාවට වැඩි ප්‍රයෝජනයක් ගත හැක්කේ.
බලන්න අපේ දේශීය වෙදකමේ පාවිච්චි කරනවා, ඉතාමත් පහසු ක්ෂායක් කුබුරු දලු ක්ෂාය. මේක ඉතා වැදගත්. ඇයි ඒ මේක තමයි අපේ පණු බෙහෙත්. මම 100% ස්තිරව කියනවා. මේ ක්ෂාය ( පෙතිත් තියනවා) කුඩා ලමුන්ට දෙනවනම් පණු බෙහෙත් දිය යුතු නැහැ. (මේකට නොයෙක් කථා කියයි) නමුත් මම ස්ථිරවම ඒක කියනවා.

ඔබ දන්නවා මම මේ බ්ලොග් ලෝකෙට පැමිණි අලුතම මඳසරුභාවය පිළිබඳ ලිපි පෙලක් ලියූවා. එහිදී මම ලියූවා පුරුෂ මඳසරුභාවය අද ලෝකයට අභියෝගයක් වෙලා තිබෙන බව. නමුත් මගේ ලිපි පෙලටත් හිනහා වුනා මිසක් ඒ ගැන යමක් හිතට ගත්තේ ඉතාම සුලු පිරිසක් විතරයි. මේ ගැන ඕනෑම අභියෝගයකට මුහුන දෙන්න ආයූර්වේදය සමත්. මේ ගැන අතිසාර්ථක පර්යේෂන දැනට ආයූර්වේදයෙන් කෙරිලා තියනවා. ආයූර්වේදයට මේ රෝගය පරාදයි.

ඒත් ජාතියක් විදියට,……...

අනේ මන්ද අපි බොහෝම පරාදයි. ගොඩ ඒමක් නම් නැහැ.

මම තවත් එක් උදාහරනයක් දෙන්නම්. මේ පුරුෂ මඳසරුභාවය ගැන පර්යේෂණ ගැන ලංකාවේ යම් තැනක (පර්යේෂණ සඳහා රාජ්‍ය අනුග්‍රහය දෙන තැනක.) එක් නිළධාරියෙක් කිව දෙයක් මේ,

"ඕගොල්ලො මොනවද මේ කරන පර්යේෂන? ලෝකෙට ජනගහනය වැඩිවෙලා ඉන්නවා තවත් වැඩි කරන්නද මේ ලෑස්ති වෙන්නේ? මේවට රජයේ මුදල් නාස්ති කරන්න බැහැ". ඔන්න අපේ රටේ හැටි. නමුත් මම දන්නවා බොහෝ පිටරැටියන් පුරුෂ මඳසරුභාවයට මෙම වෛද්‍ය ක්‍රමය ප්‍රයෝජනයට ගන්නවා. (ඒ කියන්නේ ලංකාවේ ජනගහනය තමයි දැන් ලෝකෙට තියන ප්‍රශ්නේ, හැබැයි සුද්දො බෙහෙත් අරන් උන්ගේ ජනගහනය වැඩි වුනාට කමක් නැහැ. හැබැයි ඒක ගැන මට නම් කියන්න තියන්නේ එහෙම හිතන මහත්තුරුන්ට පින්සිද්ද වෙන්න අපිට හොදට පොල් කඩන්න පුලුවන්.)

එතකොට අපි දන්නවා බොහෝ රෝගවලට කිසිම අභියෝගයක් නැතුව ආයූර්වේද ප්‍රතිකාර කරන්න පුළුවන්. රුධිරයේ කොලෙස්ටරෝල් මට්ටම වැඩි අයට, කිරීටක ධමණීවල කොලෙස්ටරෝල් බැදීම නිසා ඇතිවන හෘද රෝගවලට ඉතාම ප්‍රත්‍යක්ෂ ඖෂධ තිබෙනවා.

රජය වහාම මේ ආයූර්වේද ක්‍රමයෙන් තව දුරටත් වැඩක් ගන්නවනම් ඉතාම ක්‍රියාශීලී නිළධාරීන් සහ වෛද්‍යවරුන් අදාල ආයතන වලට දමලා වැඩ පටන් ගන්න………..

අපි අපිට හැකි සෑම සහයක්ම ලබා දෙනවා.

මේ අනුව මට කියන්න පුළුවන් ආයූර්වේදයට නවීන පුරාණ බේදයක් නැහැ. ඕනෑම රෝගයකට ප්‍රතිකාර තිබෙනවා.

සමහර රෝග වලට ආයූර්වේද ප්‍රතිකාර පමණක් හොඳින් සෑහෙනවා. එපමනක් ඇති. නමුත් සමහර රෝග වලට ආයූර්වේද ප්‍රතිකාර වලින් වැඩක් නැහැ. කිසිම ප්‍රතිඵලයක් අත් නොවෙන රෝගත් තිබෙනවා. මේවා තෝරා බේරාගෙන රෝගියාට යහපතක් වෙන විදියට ආයූර්වේද වෛද්‍යවිද්‍යාව හසුරවන්න නම් හොද මොලයක් ඇති නිළධාරීන් පත් කරන්න.

දාගෙන තියන ලෙඩවලට තවත් එකක් එකතු කර ගත්තවත්දෝ කියලා හිතෙනවා.


කමක් නැහැ අත්ත කියන්න බය වෙන්න ඕනෙ නැහැ.......

Wednesday, October 5, 2011

කුමන ආයූර්වේද පර්යේෂණද?

ලේකම්,
දේශී‍ය වෛද්‍ය අමාත්‍යාංශය,
නාවින්න,
මහරගම.
ගරු ලේකම්තුමනි,

_________ පිලිබඳ පර්යේෂණය සඳහා රජයේ අනුග්‍රහය ලබා ගැනීම.
මාගේ පර්යේෂණය සඳහා, පර්යේෂණ කමිටුව වෙත ඉදිරිපත් කරන ලද පර්යේෂණ යෝජනා පත්‍රය, ඉදිරිපත් කර කාලයක් ගත වී ඇතත් ඒ පිලිබඳ දැනුම් දීමක් මා වෙත නිල වශයෙන් මේ වන තෙක් දන්වා නැත. වාචිකව මට දැනගන්නට ලැබී ඇති අයුරු, මෙම පත්‍රිකාව සායනික පර්යේෂණයක් ලෙස කරගෙන යාමටත්, ආචාර ධර්ම කමිටු අනුමැතියට යොමු කරීමටත් අවසර ලබා දුන් බවය. නමුත් මට තවමත් ඒ ගැන දන්වා නැත. දැනටත් වසර හතරක් පමන කාලයක් තිස්සේ පර්යෙෂණ කමිටු අනුමැතිය ලබා ගැනීමට ගත වී ඇත.

ගරු ලේකම්තුමණි,
1. ----------------- විශ්ව විද්‍යාලීය වෛද්‍ය පීඨ ආචාර ධර්ම කමිටුව වෙත මෙම පර්යේෂණය ඉදිරිපත් කිරීමට මවිසින් සියළු කටයුතු සූදානම් කරගෙන ඇත. ඒ සදහා අප දෙපාර්තමේන්තුව යටතේ පර්යේෂණ කමිටු අනුමැතිය ලද තොරතුරු එම ආචාර ධර්ම කමිටුව වෙත දන්වා යැවීමට අවශ්‍යය.

2. එංගලන්තයේ කැන්ටබරි විශ්ව විද්‍යාලය සමඟ එක් වී කරන පර්යේෂණයක් ලෙස මෙය සිඳු කිරීමට මට මේ වන විට සියළුම පහසුකම් ලැබී ඇත. මා හට අත්‍යාවශ්‍යම වන ආයූර්වේද පර්යේෂණ කමිටු අනුමැතියෙන් හෝ ශ්‍රී ලාංකික සම්බන්ධයකින් තොරව මෙම පර්යෙෂණය කිරීමට හැකියාවක් ඇතත් එහිදී මෙහි අයිතිය ලැබෙන්නේ අපට නොව ඔවුන්ටයි. නමුත් මම, නාවින්න පර්යෙෂණායතනය, හා කැන්ටබරි විශ්ව විද්‍යාලය යන ආයතන එකමුතු වී කරන පර්යේෂණයක් මගින් (මෙහිදී සියළුම අනුමැතියන් ලබා දෙන්නේ අප ආයතනය බැවින්) පර්යේෂණයේ සම්පූර්ණ අයිතිය හා එහි ගෞරවය ලබෙන්නේ අප ආයතණයටයි. තවද මෙහිදී ඇතිකර ගන්නා සම්බණ්ධතාවය නිසා ලෝකයේ ප්‍රමුඛම ආයතනයක් හා එක්වී පර්යේෂණ කිරීමේ වාසිය ඉදිරියටත් අපට ලැබෙනු ඇත.

මාහට ඉහත කමිටු අනුමැතිය පිලිබඳ එම තොරතුරු නොපමාව ලැබීමට සලස්වන්නේනම් එය මට මෙම පර්යේෂණය සදහා ඉතිරි වැඩ කටයුතු වලට මහත් උපකාරයක් වන්නේය.
ඔබතුමා මාහට මෙම පර්යෙෂණය සඳහා ලබා දුන් අනුග්‍රහය මෙම කරුණ සම්බන්ධයෙන්ද ලබා දෙන මෙන් ඉතාමත් කරුණාවෙන් ඉල්ලා සිටිමි.
විශ්වාසී


පිටපත්.
1. ආයුර්වේද කොමසාරිස්,
2. අධ්‍යක්ෂ බණ්ඩාරනායක ආයුර්වේද පර්යේෂණ ආයතනය,

__________________________________________________________

2006 පමන සිට 2010 දක්වා මවිසින් යවන ලද ලිපිවල තොරතුරු මෙහි සදහන් කොට ඇත.
(2010/07/19) ගරු ලේකම් තුමාවෙත මාගේ ලිපිය.

(2006/09/11) පළමු වරට මාගේ පර්යේෂණ පත්‍රකාව ඉදිරිපත් කල පසු, මගෙන් ඉල්ලූ නිවැරදි කිරීම සම්බන්ඳ ලිපිය.

2007/07/27, මවිසින් ආයූර්වේද පර්යේෂණ හා ආචාර ධර්ම කමිටුව වෙත යොමු කරන ලද ලිපිය

2007/06/05 දින ගරු ලේකම් තුමා විසින් මවෙත සාකච්ඡාවක් සදහා ඉදිරියේදී දිනයක් ලබා දෙන බව දන්වන ලද ලිපිය.

2007/06/05 දින ගරු දේශීය වෛද්‍ය අමාත්‍ය තිස්ස කරලියැද්ද මැතිතුමාද මා වෙත එවන ලද ලිපිය.

2007/06/13 දින ගරු ලේකම් තුමා 2007/06/20 දින පෙ.ව.11 සාකච්ඡාවක් සදහා පැමිනෙණ ලෙස දැන්වූ ලිපිය.

2007/11/13 දින මාවෙත ආයූර්වේද පර්යේෂණ ආචාර ධමර්‍ කමිටුවෙන් මාගේ පර්යේෂණයේ, පර්යේෂන ක්‍රමවේදය නිසියාකාරයෙන් නැවත සකස් කර එවන මෙන් ඉල්ලා සිටි ලිපිය.

2009/03/20 දින ගරු කොමසාරිස්තුමිය මා වෙත එවන ලද ලිපිය.

2010/06/01 දින මගේ පර්යේෂනයේදී මවිසින් භාවිත කරන ඖෂධ වට්ටෝරුව සදහන් කර නැති බව මවෙත දන්වන ලද ලිපිය.

පලමුව ඉදිරිපත් කරන ලද මාගේ පර්යේෂන යෝජනා පත්‍රය. (2010/02, මස ඉදිරිපත් කලෙමි.)

2010/06/10 දින දෙපාර්තමේන්තුවේ ඉල්ලීම පරිදි නිවැරදි කර ඉදිරිපත් කරන ලද පර්යේෂන පත්‍රිකාව.
-----------------------------------------------------------------------------------------------

ඔබ ලංකාවේ ආයූර්වේද වෛද්‍ය විද්‍යාව සම්බන්ධව පර්යේෂණ කෙරෙන්නේ නැතැයි සිතන බව මම දනිමි.

එහි යම් සත්‍යතාවක්ද ඇති බව දනිමි.

නමුත් එසේ වන්නේ ඇයිද යන කාරණය ගැන පැහැදිලි කිරීමට මම මෙය අවස්තාව කර ගනිමි.

ඉහතින් සදහන් වන්නේ මවිසින් ආයූර්වේද අමාත්‍යාංශයේ ගරු ලේකම් තුමා වෙත යවන ලද ලිපියකි. මීට පසු 2011 වසර පුරාවටත් තවත් ලිපි කීපයක් හුවමාරු වී ඇත.

නමුත් තවමත් ප්‍රතිඵලය 2006 මම මගේ පශ්චාත් උපාධි අධ්‍යාපනය ඇරබූ තැනමය. එක් හෝ අඩියක් ඉදිරියට ගොස් නැත. මේ නිසා කුමන ආයූර්වේද පර්යේෂණද?

මම මේ වන විට මගේ පශ්චාත් උපාධිවලත් අවසානයට පැමින ඇත. තවත් නොබෝ දිනකින් මට තවත් අධ්‍යාපනයේ යා යුතු සියළු කඩඉම් මම ජයගනු ඇත.

එහෙත්!

මම මට ලද අවස්ථාව ලබා ගතිමි.

මේ නයින් බලන කල මට මම ද්‍රෝහියෙක් දැයි සිතෙන වාරද අපමනය. නමුත් හුදු පෘතග්ජනයෙක් ලෙස මමද යමක් ලැබීමට ආසා ඇත්තෙමි.

ඒ නිසා මට විදේශයකින් ලැබුනු අවස්තාව පිලිගත්තෙමි. එහෙත් මෙය නිවැරදි කිරීමට සෑහෙන උත්සාහයක් 2011 වසර වනතෙක්ම දැරූයෙමි.

අවසන් ප්‍රතිඵලය 0 නිසා දැන් වෙනතක් බලාගෙන සිටිමි.

කෙසේ හෝ අවසන ලොව පෙලන මහත් වූ දරුනු ලෙස පැතිරී යන රෝගයකට, කල පර්යේෂණවල ප්‍රතිඵල ලැබී ඇත. අප සාර්ථකය.

වැඩි දිනක් ගත වීමට පෙර ලොව ජනතාවට ඒ ප්‍රතිලාභ ලැබෙනු ඇත.

හැබැයි මගේ මව්බිමේ නම ඒහා නොකියවෙනු ඇත.

මා මැරෙන මොහොතේත් එය මගේ සිතට වදදෙනු ඇතැයි මට සිතේ.

ඔබ මට ද්‍රෝහියෙකැයි නොකියනු ඇතැයි මම සිතමි…………..

Tuesday, October 4, 2011

නව තාක්ෂණය අනුව ආයූර්වේද ඖෂධ නිපදවීමට හැකිද?

















අද වන විට ලෝකය විශාල වෙනස්කම් වලට භාජනය වෙමින් තියෙන්නේ. ඒ වෙනස්කම් හැම විටම යහපත්ම කියලා කියන්න අමාරුයි. සමහර වෙනස්කම් තිබෙනවා යහපත්. තවත් සමහර වෙනස්කම් තිබෙනවා අයහපත්. ඒක එහෙම වෙන්න ඕනෙ, මොකද මේ සමාජේ ජීවත් වෙන අය විවිධ නිසා.

හැම විටම අපේ තෝරා ගැනීම හරිම වෙන්නේ නැහැ.

මේ වෙනස ආයුර්වේදට කොයිතරමින් බලපානවද?

ඒ ඇතිවන වෙනස්වීම් වලට අපි සංවේදීද?

ඒ වෙනස්කම් හැම විටම හොඳ අතට හරවා ගැනීමේ හැකියාව අපට තියනවද ?

මෙන්න මේ කාරණා තමයි මට මෙහිදී වැදගත් වෙන්නේ.

අද නව සමාජය ආයූර්වේද ඖෂධ භාවිතා කිරීමට කැමතියි. ඒකට මා වැනි ආයූර්වේද වෛද්‍යවරුන් සතුව සාක්ෂි තිබෙනවා. මම එහෙම කියන්නේ අප වෙත පැමිනෙන අයගෙන් 70% - 75% විතරම ඉතාම තරුණ අය වීමයි. මෙතනදි මම තරුණ කියන යෙදුම යෙදලා තියන්නේ අවුරුදු 30 අඩු අයට. අනික් අයගේ වැඩි පිරිස අවුරුදු 45ට අඩුයි. දැනට මා සතුව, මගේ වසර 15 පමන වෛද්‍ය ජීවිතයේ වෙදකම් කල සියළුම රෝගීන්ගේ විස්තර තිබෙනවා.

මා වෙදකම් කල රෝගීන් ඉතා සුවිෂේශී අය. මේ හැම දෙනෙක්ටම මුලින්ම අවශ්‍ය වන්නේ,
1. අපේ සුදුසුකම්.
2. අපි සුව කල අසීරු රෝගීන් සම්බන්ධ වාර්ථා. (එනම් අපි යම් පර්යේෂන කර තිබෙනවාද වැනි කරුණු.)
3. අපේ ස්ථාවරත්වය නොහොත් අපිට සමාජයේ ආයූර්වේද වෛද්‍යවරයෙක් ලෙස රැදී සිටීමේ හැකියාව නොහොත් අපේ ආර්ථික ස්ථාවරත්වය.
4. ඉංග්‍රීසි කථා කිරීමේ හැකියාව.( සමහර මෙහෙම රෝගීන් හරියට කඩු ෆයිට් දන්නේ නැහැ. ඒ වුනාට අපි දැන ගන්න ඕනෙ.)
5. අපි භාවිතා කරන වාහනයේ වර්ගය, මිල, මොඩලය, ජාතිය, අම්ම අප්පා වගේ කරුණු.

මෙන්න මෙවැනි අය තමයි ආයූර්වේද භාවිතයට නගරබඳව යොමුවෙලා ඉන්නේ.

ඔය ඇවිල්ල වෛද්‍යවරයා ගැනනේ.

6. ඊලඟට කට්ටියට ඕනෙ වෙන්නේ,
ලේසියට පහසුවට ප්‍රයෝජනයට ගන්න පුළුවන්ද කියන කාරණය.

ඒ කියන්නේ ක්ෂාය තම්බන්න ඕනෙද?

එහෙම කරන්න අපිට අමාරුනේ,

අපි දන්නේ නැහැනේ ක්ෂාය තම්බන්න.

ඔන්න එක ඈඩියාවයි.

මේකෙන් වෛද්‍යවරයා හඳුනා ගන්න හැටි මම කලින්ම කියලා තියනවා.

අද මම කියන්න සිතා සිටින්නේ, නව තාක්ෂණය අනුව ආයූර්වේද ඖෂධ නිපවීමට හැකිද කියන අර ඉහත කට්ටියගේ ප්‍රශ්නෙට පිලිතුර.

මේකෙදි භාවිතා කරන රසායන විද්‍යා මූල ධර්ම නැතිව ඔබට වැදගත් වන ඖෂධීය කරුණු ගැන පමණක් කථා කරන්නම්.

ලෝකෙ ආයූර්වේදය, වගේම බටහිර වෛද්‍ය විද්‍යාව මේ සියල්ලම මුලින්ම ඖෂධ ලෙස භාවිතා කලේ ශාඛ. නොයෙක් හේතු විශේෂයෙන්ම කාළගුනික හේතු නිසා සහ නූතන රසායන විද්‍යාවේ දියුණුවත් සමඟම බටහිර වෙදකම වේගයෙන් තමන්ගේ ඖෂධ නිශ්පාදන වලට රසායනික උපාදානයන් භාවිතයට හුරු වුනා. දැන් නවීන ලෝකයේ බටහිර ඖෂධ කියන්නේ කෙලින්ම රසායනිකව සකස් කරන ලද ඖෂධයක්.

නමුත් ආයූර්වේද වෛද්‍ය විද්‍යාව එහි අර්ථයෙන්ම මෑතක් වන තෙක්ම තනිකරම ශාඛ හෝ රස විද්‍යාවේ එන පාර්ථිව ද්‍රව්‍යයන්ගෙන් පමණ සෑදුනක්ම විය. එහිදී ඖෂධ නිපැයූවේ ක්ෂාය සංස්කරණ ක්‍රම අනුවයි.

ක්ෂාය සංස්කරණ විදි පසෙකි.
1. ස්වරස - අමු ද්‍රව්‍ය එකෙනෙහිම ගෙන තම්බා (පුට දී ) මිරිකා ගත් යුෂ භාවිතයට ගැනීම. ( මෙහිදී භාවිතා කරන නොයෙක් ක්‍රම ඇත.)
2. කල්ක ක්ෂාය - අමු හෝ වියලි ද්‍රව්‍ය සියුම් ලෙස කුඩු කර ජලයෙන් හෝ වෙනත් ක්ෂායක් මිශුකර අඹරා ගැනීමෙන් සාදා ගත හැක.
3. ක්වාථ ක්ෂාය - ද්‍රව්‍ය කුඩාවට කපාගෙන පිරිසිදු කර ජලය දමා සින්දවා ගැනීමෙන් මෙම ක්ෂාය සාදා ගනී. අරිෂ්ටයද මෙයටම අයත් ඖෂධ වුවත් මේවාට දැන් මෙන් ඇල්කොහොල් එක් කරන්නේ නැත.ස්වභාවිකව මධ්‍යසාර සංධානය වීමට මලිත මල් උපයෝගී කර ගනී. මෙහිදී ශරීරයට හානියක් නොවූවත් වර්ථමාන ක්‍රමයේදී ඇල්කොහොල් වලට ඇබ්බැහි වීමක් ඇති විය හැකි නිසා දැන් උගත් ආයූර්වේද වෛද්‍යවරු ඉතා සීමිතව භාවිතා කරයි.
4. හිම ක්ෂාය - හොදින් කුඩු කර ගත් ද්‍රව්‍ය නියමිත ප්‍රමානයට ජලය දමා මැටි මුට්ටියක හෝ වීදුරු බඳුනක රැයක් එලිවෙනතුරු තබා, උදයේම මිරිකා භාවිතා කිරීම.
5. ඵාණ්ට ක්ෂාය - නියමිත ද්‍රව්‍ය හොඳින් කුඩු කර භාවිතයට ගැනීම හෝ නියමිත ජල පරිමාවක් සමඟ රත් කර සිදුවා ගැනීම.
( තවත් අනු ක්‍රම රාශියක් ඇතත් ප්‍රධාන වන්නේ මේවායි.)

දැන් මම ඔබගේ අවධානය ඉහලින් වූ ඡායාරූපය වෙත යොමුකරනවා. ඔබට සිතෙන්නේ කුමක්ද?

මේ තිබෙන්නේ ලංකාවේ ආයූර්වේද වෛද්‍යවරුන් අතර සුපතල ක්ෂාය කීපයක් නවීන තාක්ෂනයට අනුව සකසා ඇති අයුරුයි. මෙහිදී මෙම ඖෂධ සෑදීමේදී භාවිතා කර ඇත්තේ බටහිර ඖෂධ සකසන තාක්ෂණයමයි. මෙහි ඇති වෙනස වන්නේ මේ ඖෂධ සඳහා යොදාගෙන ඇත්තේ ශාඛ ද්‍රව්‍යම වීමයි. මෙවැනි ආයතන විශාල ගනනක් ඉන්දියාවේ තිබෙන අතර ලෝකයේ රටවල් 120 පමණ තම නිශ්පාදන අපනයනය කරන ඉතා සුවිශාල ආයතනයකුත් මේ අතර ඇත.

ලංකාවේ ප්‍රශ්නය වන්නේ, මෙම ඖෂධ භාවිතයට වෛද්‍යවරුන් තවම නිසි පුහුණුවක් නැතිකමයි. පුහුණුව දීමට එම ආයතන සූදානම් නමුත් රජයේ පාර්ශ්වයෙන් තවමත් ඒ පිළිබඳ සිතා නැත.

එක්තරා කාලයක් මෙම ඖෂ්ධ ගෙන්වීමට විශාල බදු පැනවීය. ඉන් බලාපොරොත්තු වූයේ දේශීය ඖෂධ නිශ්පාදන ආයතන වලට තම කර්මාන්ත බාධාවකින් තොරව කරගෙන යාමට ඉඩ දීමලු.

එසේ වුවත් ලංකාවේ නිශ්පාදන ආයතන අදද අරිෂ්ටයන් සහ කිසිම ගුණයක් නැති, ප්‍රමිතිය පිළිබඳව කිසිම සහතිකයක් නැති, සායනික පර්යේෂන වචනයවත් නොදැන නිශ්පාදනය කරන ඖෂධ ජනතාවට බෙදමින් සිටියි.

මම කිසිදා ඉන්දියාවටවත් වෙනත් රටකටවත් වඩා මගේ රටට ආදරය කරමි. නමුත් අපි කරන්නේ ජනතාව සුවපත් කිරීම බැවින් වඩා හොද දේ ජනතාවට ලබා දීම අපගේ යුතුකම යැයි මා කීවොත් ඔබ ඊට එකඟ වේ යැයි සිතමි. මෙහිදී කල යුත්තේ මේ වඩා දියුනු නිශ්පාදනයන් අපගේ රටේදී නිපදවීමට උත්සාහ කරමින් ක්‍රමයෙන් එය වැඩි දියුනු කිරීමයි. එසේ නැතිව වඩා හොඳ නිශ්පාදනයන් ජනතාවට ලැබීම වැලකීම නොවේ. මේ ලෙස ආයුර්වේදය දියුනු කරන්නේ කෙසේ දැයි මට නම් ගැටළුවකි.

කෙසේ හෝ දැන් පුද්ගලිකව මෙම පුහුණුව ලැබූ වෛද්‍යවරුන් ගනනාවක්ම අපට සිටී. මා යටතේද වෛද්‍යවරුන් පුහුණුව ලබයි. මේ සියල්ල කිරීමෙන් අප කිසිවෙක් සතයකුදු හබ්බ කරන්නේ නැත. එම නිශ්පාදන ආයතන වලින්වත් අප මේ වන තෙක් කිසිවක් ලබාගෙන නැත.

මෙයින් අප බලාපොරොත්තු වන්නේ ජනතාව වැඩියෙන් ආයූර්වේදය වෙත ඇද ගැනීමයි. මේතාක් එය සාර්ථක වී ඇත.


අප ලබනා විශාලම සතුට එයයි.

Saturday, October 1, 2011

ආයූර්වේදය කාගේ බූදලයක්ද?

අද මම ලියන්න සිතා සිටි ලිපිය මෙය නෙමෙයි. ඇත්තෙන්ම ඉන් 3/4 පමණ මේ වන විට ලියාත් අහවරයි.

ඒත් මට හිතුනා ඒ වෙනුවට මේ ලිපිය අදම දමන්න.

මම මේ ලිපිය ලියන්න කලින්ම කියන්න ඕනෙ මම මේක ලියන්නේ විවාදකට යන්නවත්, කාටවත් මඩ ගහන්නවත් නෙමෙයි.

ආයූර්වේද වෛද්‍යවරයෙකු ලෙස මට යුතුකමක් තිබෙනවා ආයූර්වේදෙට යම් හානියක් වෙනවනම් ඒ ගැන කථා කරන්න. විශේෂයෙන්ම මේ වන විට බ්ලොග් අවකාශයේ ආයූර්වේද අනන්‍යතාවක් සහිත එකම වෙබ් අඩවිය මේක නිසා මේ යුතුකම මගේ කර පිටම වැටිලා තිබෙනවා. ( මගේ ගෝල ගෝලියෝ දැන් මේ අඩවිය අනුව තමනුත් බ්ලොග් අවකාශයට එක් වීමට කැමැත්තෙන් සිටිනවා. ඉක්මනින් මම ඒ අයවත් මෙතනට එක් කරනවා.)

කෙසේ හෝ අද පුවත් පත් බලද්දි තමයි මේ අදහස මට ආවේ. විශේෂයෙන්ම ඉරිදා පුවත් පත් අරන් බලන්න මේ හැම එකකම තිබෙනවා අයූර්වේදය ගැන යම් යම් දැන්වීම මහා රාශියක්,
ඒවා නිශ්පාදන,
රුව රැකීම ගැන කොටින්ම කිව්වොත් හර්බල් සැලෝන්,
තව හර්බල් මසාජ්,
තව අයූර්වේද විටමින,
ලිංගික ශක්තිය ඇති කරන ආයූර්වේද ඖෂධ,
සති ගනන් පමා වූ කාන්තාවන්ගේ මාසික තත්ත්වයන් සැනින් ඉටුකර දෙන ස්ථාන,
දරුවන් නැති අයට දරුවන් ලබා දෙන ඩිස්පැන්සරි,
තව තව දේවල් මහා ගොඩයි. මේ අතර තිබෙනවා ටැබලොයිඩ් පත්තර. මේවායේ නොයෙක් නොයෙක් අය තමන්ගේ උපදෙස් ලබා දෙනවා ජනතාවට අර කලින් වගේ රුව රැකීමට, සෞක්‍ය රැකීමට……..

මගේ අම්මෝ මෙහෙමත් උපදෙස් ......

කවුද මේ උපදෙස් ලබා දෙන්නෙ,

නළු නිලියො,
ක්‍රීඩකයෝ.

කමක් නැහැ ඕනෙ කෙනෙක් ඔන දෙයක් කිව්වට ඒත්මට ලඟකදි දකින්න ලැබුනා එක් නිළියක් රුව රැකීමට උපදෙස් දෙන ගමන පොඩි ක්ෂායක් කියලා නිතර බොන්න කියලා. ඇය දන්නේ නැතුව ඇති ඒක ඖෂධ ශාක දක තුනක ක්ෂායක් වුවත් අපි එක දිගට සතියකට වඩා දෙන්නේ නැහැ. මොකද වැඩිපුර මුත්‍රා පිට වෙන්න ගන්නවා. එය හොඳ නැහැ. මෙන්න මෙහෙමයි මේ වැඩ.

නමුත් මේවා මේ මිනිස්සුන්ගේ අහිංසක ප්‍රයෝග. මේ අය කීයක් හරි හොයා ගන්න එහෙමත් නැත්නම් තමන් යම් තත්ත්වයක් ඇත්තෙක් බව පෙන්වන්න කරන දෙවල්. මේවට රැවටෙන පිරිස අද අඩුයි.

නමුත් හිතන්න යම් ආයූර්වේදෙට වගකියන බලතල ඇති ඒත් ආයූර්වේදෙ නොදන්න මහත්වරු කට්ටියක් මේකම වෙනත් විදියකට කලා කියලා. රාජ්‍ය අනුග්‍රහය ඇතිව.....

ජාතියක් පිරිහෙන වැඩක් නේද?

(මේක දිහා දේශපාලන ඇසකින් බලන්න එපා.)

ශ්‍රී ලංකාවේ නීතිය අනුව යම් ඖෂධයක් ලංකාවට ගෙන ඒමේ ක්‍රමවේදයක් තිබෙනවා. පාර්ලිමේන්තුවේ බහුතර මංත්‍රී ගනනක සම්මතයෙන් පනතක් ලෙස තමයි එම නීති ඇති කරලා තිබෙන්නේ. ඒකට අනුව මෙහෙම ඖෂධයක් ගෙන්වද්දී අනුගමනය කලයුතු ක්‍රමවේදයට අනුව ඒ පෝරම පුරවලා අදාල තත්ත්ව සහතික ගන්න වෙනම කෙනෙක් ඕනෙ ඒ ටික ඔසවන් යන්න. ඒ තරම් විශාලයි මේ පෝරම ටික. මේකට වගකීම ගන්න බැහැ සාමාන්‍ය කෙනෙකුට ඒ සඳහා අදාල ක්ෂ්‍රේත්‍රයේ විශේෂඥයෙක් විය යුතුයි. ඒ තරමට අපහසුයි ඒ ලියාපදිංචිය ලබ ගන්න.

පසුගිය කාලයේ මේවා ගැන එතරම් සොයා නොබලා හිතූ හිතූ හැටියේ ඕනෑම කෙනෙක්ට ඖෂධ ආනයනය කිරීමේ හැකියාව තිබුනා. ඒකෙන් අයුතු ප්‍රයෝජන අරගෙන කිසිම වැඩකට නැති ඖෂධත් ලංකාවට ආවා. නමුත් අපේ මිත්‍ර මගේ අති ජාත මිත්‍රයා වන වෛද්‍යවරයෙක්ව මේ ගැන සොයා බලන්න පත් කලා රජයෙන්. ඒ අනුව ඉතාම රටට හිතකර විදියට මේ පනත දැන් නැවත සකස් කර තිබෙනවා. ඒ අවශ්‍ය සංශෝධන පවා හදිසි කාරනයක් ලෙස ගෙන කැබිනට් අනුමැතිය ලබා නීති බවට පත් වෙලා තිබෙනවා.

නමුත් අද මේ වන විට දැඩි හස්තයකින් පාලනය වන තත්වයක් යටතේ රටට හානිකර ජනතාවගේ සෞක්‍යයට හානිකර ඖෂධ ගෙන්වීමේ තැතක් තිබෙනව.

මේ අදාල ඖෂධය 2008 දීත් ජනතාවට විකිණීමේ තැතක් ගැනුනා. නමුත් එය අපගේ උත්සාහයෙන් වැලකුනා. නමුත් දැන් නැවත වරක් මේ දෙයම දේශපාලන උවමනාවක් ලෙස මතු වී තිබෙනවා. මේ රටේ නැති ආයූර්වේද ඖෂධයක් ගෙන්වීමට තිබෙන සුදුසුම රට තමයි ඉන්දියාව. ජපානයවත් ඇමරිකාවවත් ලංකාවට ආයූර්වේද ඖෂධ ගෙන්වන්න සුදුසු රටවල්ද කියන එක මම ඔබට කිව යුතු නැහැ.

නමුත් මේ ඖෂධය මුලින්ම යෝජනා වූයේ බටහිර ඖෂධයක් ලෙස ගෙන්වීමට එහිදී පැමිණි දැඩි විරෝධය හමුවේ අකුලාගත් මේ පිරිස. නැවත දැන් හදිසියේම මෙය ආයූර්වේද ඖෂධයක් බවට පත් කර තිබෙනවා. මෙවැනි දේ මම අර කලින් කිව් වෙලද දැණ්වීම වලට වඩා භ්‍යානකයි. එනම් මේවා මේ වන විට ලෝකයේ කොහේවත් අනුමැතියක් නැති ඖෂධ. මෙරට වැසියන්ට වන හානිය බලා මෙහි තත්වය දැන ගැනීමට තමයි මොවුන් මේ සැරසෙන්නේ. ඒ විතරක් නෙමෙයි අහිංසක මිනිසුන්ගේ අතේ තිබෙන තුට්ටු දෙකටත් වැඩේ දෙන ගමන්...

අර කලින් කිව් දේවලින් හානි එන්නේ එක් පුද්ගලයටයි. ඒත් මේකෙන්......
ඔබම තීරනය කරන්න...

මම දන්නවා මම මේ දා ගත්තේ ලෙඩක් කියලා. මේ වන විට මේකට විරුද්ද වූ එක් අයෙක්ට තමන් දැරූ සියලු තනතුරු අහිමි කරලා.

මට කරන්න දෙයක් නැහැ. මරනවා ඇර මොකද මම කන්නේ මගේ මහන්සියෙන් නිසා.


අපි බලමු......