Thursday, September 29, 2011

ආයූර්වේද වෛද්‍ය ප්‍රතිකාර වලින් රෝග සුව කල හැකිද?

අපි බලමු මේ ආයුර්වේද වෛද්‍ය විද්‍යාව ලෙස හඳුන්වන්නේ කුමක්ද කියා.
මුලින්ම බලමු ආයූර්වේද යන වචනය.

"ආයූර්" ආයුෂ එහෙමත් නැත්නම් ජීවණය/ ජීවිතය වගේ තේරුමක් තමයි මින් ලබාදෙන්නේ.

වේද යනුවෙන් හඳුන්වන්නේ විද්‍යාව ලෙස අර්ථ දක්වන්න පුළුවන්.

එතකොට "ආයුෂ සම්බන්ධ විද්‍යාව". මෙන්න මේක තමයි ආයූර්වේදය නම් වචනයේ නියම අර්ථය.

දැන් පැහැදිලියි ආයූර්වේදයේ මුඛ්‍ය අරමුණ වෙන්නේ රෝගීන් ඇති නොවීමට කටයුතු කිරීම. හෙවත් Prevention is better than cure. එහෙමත් නැත්නම් රෝග ඇති වීම වලක්වා ගැනීම.

ආයුර්වේද වෛද්‍ය විද්‍යාව මගින් රෝග වැලැක්වීම මුක්‍ය පරමාර්ථය කරගෙන සේවය සලසන බව මින් පෙනෙනවා නේද? එතකොට රෝගයක් හැදුනම රෝගියෙක්ට ප්‍රතිකාර කිරීම ආයූර්වේද වෛද්‍ය විද්‍යාවේ සිදු කරනේ කොහොමද?

මෙහිදී රෝගියා මුලින්ම පරීක්ෂා කිරීම තමයි කෙරෙන්නෙ. නමුත් ආයූර්වේද ක්‍රමයේදී මෙතන පොඩි වෙනසක් තිබෙනවා. මේවා අද කාලේ නම් වැඩිය භාවිතා කරන් නැහැ. නමුත් අපේ පාරම්පාරික වෛද්‍යවරු අතර තාමත් මේ ක්‍රම නොනැසී තිබෙනවා. මමත් මේ ගැන යම් හැදෑරීමක් කරනවා.

එනම් දූත ලක්ෂණ මෙය ඉතා වැදගත්.
මේක අපිට පිලිවෙලට මෙහෙම ලියන්න පුළුවන්.

1රෝගී පරීක්ෂාව. මේ යටතේ

A. දූත ලක්ෂණ. - රෝගියා සමග පැමිණෙන හෝ රෝගියාගේ විස්තර වෛද්‍යවරයාට ලබාදෙන පුද්ගලයා සමග යම් සාකච්චාවක් කිරීම මගින් රෝගියාගේ ස්වභාවය, රෝගියාගේ පුද්ගලික වෛද්‍යවරයා දැනගත යුතු තොරතුරු ආදිය ලබා ගැනීම. එම තැනැත්තාගේ ස්වභාවය, ඇති නෑදෑකම ආදිය මගින් මේ රෝගියාගේ පසුබිම ගැන යම් අවබෝධයක් ලබා ගැනීම. මෙය අනාගතයේදී රෝගියාට ප්‍රතිකාර කිරීමේදී වැදගත් වේ.

B. රෝගියා පරීක්ෂා කිරීම. - මෙම අවස්ථාව ආකාර තුනකට කල හැක.
1. දර්ශන.
2. ස්පර්ශන.
3. ප්‍රශ්න.
මේ ආකාර තුනෙන් රෝගියා පරීක්ෂා කල යුතු යැයි, ආචාර්ය්‍යය චරක, ආචාර්ය්‍යය සුශ්‍රැත, සහ ආචාර්ය්‍යය වාග්බට යන ආයුර්වේදයේ ප්‍රමුඛම ආචාර්ය්‍යය වරුන් තිදෙනා සඬහන් කොට නැතත් යම් යම් අවස්ථාවලදී ඔවුන්ද ඒ බව දක්වා ඇත. ඔවුන් ත්‍රිවිධ පරීක්ෂණය වෙනුවට වෙනත් පංච පරික්ෂා ක්‍රමයක් දක්වා ඇත. ඉදිරියේදී එය දක්වමි.

2. අදාල රෝගය පරීක්ෂා කිරීම. -
යම් රෝගයක් යමෙක්ට වැලදී ඇති විට පහල වන රෝග ලක්ෂනද, එම රෝගය පහල වී ගෙන එත්දී ඇති වන ලක්ෂණද අනුසාරයෙන් රෝගයක් හඳුනා ගැනීම ආයුර්වේදය අනුදැන වදාල ක්‍රමයයි. එය පංචවිධ පරීක්ෂනයයි. මෙයට,
1. නිධාන
2. පූර්වරූප
3. රූප
4. උපශය
5. සම්ප්‍රාප්ති

මේ සියලුම පරීක්ෂන ක්‍රම තවත් ප්‍රධාන ක්‍රම තුනක් යටතේ රෝගියා වෙනුවෙන් ක්‍රියාවේ යොදවයි.
1. ආප්තෝපදේශ
2. අනුමාන
3. ප්‍රත්‍යක්ෂ
එනම්, පෙර ගුරුවරුන් මෙවැනි රෝග හදුනා ගැනීමට යෙදූ උපක්‍රම පිළිබඳ දැණීම ඇතිව පලමුවෙන් රෝගියා පරීක්ෂා කල යුතුයි. එවැනි උපදේශ රෝගියෙක්ගේ රෝගයක් පරීක්ෂා කිරීමට ඉතාමත් වැදගත් වේ.
ඊට පසු අප යම් රෝගයක් පිළිබඳ සැක කරන්නේ නම් ඊට අදාල පරීක්ෂණ කල යුතුයි. එනම් මෙහිදී අනුමානයෙන් රෝගය මේ යැයි සැක කිරීම හෙවත් "අනුමාන"ය දෙවැනි පියවරයි.
තුන්වැනිව එන්නේ විස්තරාත්මක අයුරින් වෙන්කරගත යුතු නියම රෝගය හඳුනා ගැනීමයි. මේ සඳහා විශාල වශයෙන් නවීන සහ පෙර කල පරීක්ෂණ දැන් අප සතුව ඇත. මේ යටතේ නවීනයේ, රසායනාගාර පරීක්ෂන විශාල වශයෙන් ඇතත් එකල පැවති ක්‍රමය වන්නේ,

1. චක්ෂුරීන්ද්‍රිය පරීක්ෂා - වෛද්‍යවරයාගේ දර්ශනයෙන් (දැකීමෙන්)රෝගියා පරීක්ෂා කිරීම.
මෙහිදී සමේ පැහැය වෙනස් වීම. රෝගියාගේ ස්වභාවයේ ඇතිව ඇති වෙනස්කම්, ඉදිමුම්, කෘෂවීම්,ආදී යම් රෝගයක් ගැන දැකීමෙන් ලබාගත හැකි හෝඩුවාවන් උගත් වෛද්‍යවරයා රෝග නිශ්චය සඳහා යොදා ගනී. මෙහිදී මල, මූත්‍ර, නේත්‍ර, ජිහ්ව පරීක්ෂා ප්‍රධාන වේ. මෙහිදී පෙරදීද අණ්වීක්ෂ වැනි උපකරන සහායෙන් කරන පරීක්ෂා පියවි ඇසින් කරන පරීක්ෂා ලෙස මෙය කොටස් දෙකකි.

2. ශ්‍රෝතේන්ද්‍රිය. - නවීනයේ පවා වෙදකමේදී මිනිස් ශරීරයෙන් නිකුත්වන විවිධ ශබ්ධවල වැදගත්කම මෙතෙකැයි කිව නොහැකිය. වෙද නලාවට ඇති තැන ගැන සිතීමෙන් මෙය ඔබට වටහා ගත හැකිය. මෙම මිනිස් ශරීරයේ ඇතිවන විවිධ වූ ශබ්ද පිළිබඳව අවධානය යොමු වූයේ අදක ඊයෙක නොවේ. වෙද නලාව යම් පුද්ගලයෙක් විසින් හදුන්වා දුන්නා යැයි යන කීම මේ නිසා මම එක හෙලාම ප්‍රතික්ෂේප කරමි. නමුත් එහි නවීන සංස්කරණයක් ඇන්ටන් හැන් ලිවෙන් හුක් විසින් කලා යැයි කීම නම් අනුමත කල හැක. බඩෙන්, පපුවෙන්, හිසෙන් නාසයෙන් ආදී ලෙස නොයෙක් ඉන්ද්‍රියයන් වලින් පිට වන්නාවූ ශබ්ද ගැන දැන ගැනීමට විවිධ වූ ක්‍රම රාශියක් ද නොයෙක් උපකරනයන් රාශියක්ද එකල භාවිතා විය. පුස්කොල පොත්වල ඇති මේ රූපයන් මා සතුව ඇත. ඇත්තෙන්ම මේවා ඉතාමත් පුදුමාකර උපකරන බව පෙනේ. එනම් නවීනයේ ඇති උපකරන හා එකට තිබූ විට මේවා කිසිම වෙනසක් නැතිව සමාන බව පෙනේ. ඉදිරියේදී ඔබට බලා ගැනීමට මෙම රූපයන් ම'විසින් බ්ලොග් අවකාශයට එක්කිරීමට සිතා සිටිමි.

3. ස්පර්ශේන්ද්‍රිය පරීක්ෂා,
මෙහිදී ශරීරයේ උෂ්ණතාවයන්, ශීතතාවයන්, රළුබව, අතිශයින් මෘදුවීම, ස්ථබ්ධ වීම්, වේදනා සහිත තැන්, අභ්‍යන්තර ඉන්ද්‍රියන්ගේ විශාල වීම්, තවත් ඉතාමත් විද්‍යාත්මක පරීක්ෂණ විධියක් මේ ස්පර්ශ පරීක්ෂාවය යටතේ සිදු කරයි. අවාසනාවකට මේ කොටසද අද අභාවයට ගොස් ඇත. කනගාටුවෙන් වුවත් කිව යුත්තේ මාහටද මේ ක්‍රමයේ වැඩි පරිචයක් නැති බවයි. එනම් නාඩි පරීක්ෂාවයි. පෙර වෙදැදුරන් නාඩි පරීක්ෂාවෙන් රෝගීන් පිළිබඳ විශාල තොරතුරු ප්‍රමාණයක් හෙලිකොටගෙන ඇත. මෙය වෙනම පෝස්ටයකට කාරණාවක් නිසා ඒ ගැන මින් නවතමි.

4. රසෙන්ද්‍රිය පරීක්ෂා - රසෙන්ද්‍රිය පරීක්ෂාව ප්‍රත්‍යක්ෂයෙන් නොව අනුමානයෙන් පරීක්ෂා කල යුතුයැයි සෘෂිවර චරක කියා ඇත. මෙහිදී රස පරීක්ෂාව ඉතා වැදගත් වේ. එනම් ආයූර්වේද විද්‍යාවට අනුව විවිධ වූ රසයන් හයක් දක්නට ඇත. මෙම රසයන්, කටේ, කෙලවල, මලවල, මුත්‍රාවල, දහඩියේ, ආදී ශාරීරික ස්‍රාවයන් වල ඇති ආකාරය මෙහිදී පරීක්ෂාවට භාජනය කර ඇත. ඒ සඳහා නොයෙක් උපක්‍රම යොදාගෙන ඇත.

5. ඝාණේන්ද්‍රිය පරීක්ෂා - මෙය නවීන වෛද්‍යා විද්‍යාවේදීද බහුලව කරණු ලබන පරීක්ෂණයකි. ලේ, මල මූත්‍රා, සැරව, ශුක්‍ර, ආදිය පරීක්ෂා කිරීමේදී ද, සෙම සොටු ආදියේ පරීක්ජ්ෂා වලදීද ගන්ධය වැදගත් සාධකයකි. තවද රෝගීන්ගේ ශරීරික ගන්ධයන්ද මෙහිදී ඉතා වැදගත් වේ.

ප්‍රශ්ණ පරික්ෂා.
මෙය ආයූර්වේද වෛද්‍ය ක්‍රමය පමණක් නොව නවීන වෛද්‍ය ක්‍රමය ආදී සෑම වෛද්‍ය ක්‍රමයකම ඇති ප්‍රධානම පරීක්ෂණ ක්‍රමයයි. මෙහිදී ආයූර්වේද වෛද්‍යවරයා ප්‍රශ්ණ පරීක්ෂාව ක්‍රියාවේ යෙදිය යුතු පිළිවෙලක් ඇත. එනම්,
1. දේශ - රෝගියා වාසය කරන ප්‍රදේශය දැන ගැනීම. එනම් එහි ඇති දූවිලි, උෂ්ණ, ශීතබව ආදී විපර්යාසයන් රෝගයට බලපාන ආකාරය දැන ගැනීම උදෙසාය.
2. කාල - යම් යම් රෝග සමහර කාලවල අධික වන නිසාය. උදය කාලයේ සවස රාත්‍රී ලෙස මෙන්ම සෘතුව, ආදියද වැදගත්ය.
3. ජාති - යනු රැකියාවයි. රැකියාව අනුවද මිනිසාට විවිධ වූ රෝග වැලදිය හැකි වේ.
4. සාත්ම්‍ය - එනම් එම රෝගයට සුව එලවන ආහාර විහරන ඖෂධ ගැන සොයා බැලීමයි. මේ සඳහාද නොයෙක් උපක්‍රම ඇත. විස්තර වශයෙන් ඉදිරියේදී සාකච්ඡා කිරීමට සිතා සිටිමි.
5. ආතංක සමුත්පත්ති - රෝගය හටගත් පිළිවෙල. එනම් යම් ආහාරයක් නිසාද, විෂබීජ, වසංගත, ආඝාත, විෂ මේ ආදී වූ හෙතුව පිළිබඳ සොයා බැලීමයි. මෙයටද උපකාරී වන උපක්‍රම විශාල ගනනාවක් ඇත.
6. වේදනා සමුච්ඡාය පරීක්ෂාව. - එනම් රෝගියාට ඇතිවන වේදනාවේ ස්වභාවය පිළිබඳ දැන ගැනීමයි. මෙය දාහ (පිළිස්සෙනවා වැනි ), වෝෂ (ඉරවීම වැනි ), භේද- කඩනවා වැනි, ශීත දැනෙන, කම්ප - දැඩි කම්පනයක් දැනෙන, අංග මර්ධ - ඇග රිදීම, වැනි නොයෙක් ආකාරයේ වේදනාවන් පිළිබඳ දැන ගැනීම.
7. බල - බලය කාය බලය, මනෝ බලය විසින් දෙවැදෑරුම්ය.
8. අන්තරාග්නි පරීක්ෂාව - බඩ ගින්නේ ස්වභාවය පිළිබඳ දැන ගැනීම.
9. අධෝගත වාතයාගේ පැවැත්ම හෝ නොපැවැත්ම.
10. මල මුත්‍ර පහ වීම හෝ නොවීම.
11. කාල ප්‍රකර්ශය.
මේ වැනි රෝග පරීක්ෂා ක්‍රම විශාල ගනනක් ආයුර්වේද වෛද්‍ය ක්‍රමය තුල පවතී. නවීනයේ ඇති ක්‍රමද ප්‍රයෝජනයට ගැනීමේ හැකියාව බොහෝ ආයූර්වේද වෛද්‍යවරුන්ට අද ඇත. ඒ නිසා බොහෝ විට නිසැකවම නිශ්චිත රෝගය හදුනා ගැනීම නිසි විධිමත් අද්‍යාපනයක් ලද ආයූර්වේද වෛද්‍ය වරයාට ඉතා පහසු කටයුත්තකි.

ඖෂධ අතින් බැලූ විට ආයූර්වේදයේ තරම් විවිධ වූ ඖෂධ ඇති වෛද්‍ය විද්‍යාවක් තවත් ඇද්දැයි මට නම් සිතා ගත නොහැකියි. මේ අනුව ඔබගේ ඕනෑම රෝගයකට ප්‍රතිකාර කිරීමට ආයූර්වේද වෛද්‍ය වරයා සමත් බව මම නිභයව කියමි.

මෙතැනදී ඇතිවන තවත් ප්‍රශ්න දෙකක් ඇත.
1. ආයූර්වේද ඖෂ්ධ භාවිතය නිසා රෝග සුවවුවත් එය ප්‍රමාදයි.
2. ආයූර්වේද ඖෂ්ධ භාවිතය ඉතා අපහසුයි. රැකියාකරන අයට නම් මේක හරිම අපහසු වැඩක්.
මේ ප්‍රශ්න දෙක ගැනත් යම් සාකච්ඡාවක් ඉදිරියේදී කරමු....

Monday, September 26, 2011

ශ්‍රී ලංකාවතුල ආයූර්වේදයේ අනාගතය සරුවෙයිද?

මම අද ලියන්නේ වෙනත් දෙයක් ගැන.

නමුත් සතියකට සැරයක් ගානේ විශ්වාරම්භය ගැන ලිපිය දමනවා………….

මම ආයුර්වේදයෙන් ඉගෙන ගත්ත ඉතාම වටිනා පාඩම ගැන තමයි ඔබට කියන්න සිතුවේ. 1988 මහා භීෂණයක් රටේ තිබෙන වෙලාවෙ තමයි මම මුලින්ම ආයුර්වේදෙට අවේ. එතනත් අවුල් බොහෝමයි ඒ කාලේ.....

අයූර්වේද විද්‍යාව තියා ඔය ගැන කිසිම දෙයක් මම දැනන් උන්නේ නැහැ. හැබැයි මේ වෙනකොට ආයුර්වේද විද්‍යාව, බුදු දහම වගේ විෂයන් සම්බන්ධව මගේ යම් කිසි මානසික පිබිදීමක් ඇති වෙමිනුයි තිබුනේ. මේ තීරනයට කිසිවෙක් එතරම් කැමැත්තක් දැක්වූයේ නැහැ. නමුත් දෛවය මාව එතැනට ගෙන ගියා. අවංකවම මා සහ මගේ සියළුම ලබැඳියන් අද සතුටු වෙනවා මා ආයුර්වේද වෛද්‍යවරයෙක් වීම ගැන.

ආයුර්වේදය කියන්නේ දාර්ශනික පදනමක් මත ගොඩනැගුණු විද්‍යාවක්. මෙහිදී ඉගැන්වෙනවා ප්‍රධාන කරුණු කීපයක්.

1. ආයුර්වේද වෛද්‍ය විද්‍යාව.
2. බටහිර වෛද්‍ය විද්‍යාවේ මූල ධර්ම.
3. පෙරදිග දර්ශනය.
4. සිංහල, සංස්කෘත, හින්දි වගේම ඉංග්‍රීසි භාෂාවන්.

මේ වගේ විෂයන් තමයි අපි මුලින් ඉගෙන ගන්නේ. ඔතන තිබෙන අමාරුම දේ තමයි භාෂා අධ්‍යනය. වසර තුනක් පමන කාලයක් භාෂාවන් ඉගෙන ගත යුතුයි. හැබැයි තුන්වන වසරෙදී පවත්වන පරීක්ෂණයෙන් භාෂා වලින් අනිවාර්ය්‍යයෙන්ම සමත් විය යුතුයි. එහෙම නැති කෙනෙකුට පංති සාමාර්ථයක් ලබා ගත නොහැකියි. අසමත් වුවොත් යම් හෙයකින්, අවසාන පරීක්ෂණය සමත් වීමට ප්‍රථම ඒවා සම්පූර්ණ කල යුතුයි. එහෙම නැත්නම් වෛද්‍ය සීමාවාසික පුහුණුව ලැබීමට නොහැකියි. ඒ භාෂා අධ්‍යනය.

ඊලඟට එන්නේ ආයුර්වේද වෛද්‍ය විද්‍යාව මෙකෙදි. ආකාර කීපයකින් අධ්‍යනය කල යුතුයි.

1. ආයුර්වේද මූල ධර්ම.

2. ආයුර්වේද චිකිත්සාව. මෙහිදීත් මේ යටතේ අංශ දෙකක් අධ්‍යනය කරනවා.ඒ තමයි, ආයුර්වේද චිකිත්සාව හෙවත් ඉන්දියාවත් ලංකාවත් දෙරටම භාවිතා කරන ඉන්දියානු ක්‍රමය. ඊලඟට අපි අධ්‍යනය කරනවා. ලංකාවේ දේශීය ක්‍රමය. සාමාන්‍යයෙන් සලකන්නේ මේ ක්‍රමය ඉතා පැරණි ක්‍රමයක් විදියට. (මේ ගැන වෙනම පෝස්ට් එකක් ලියන්න වෙනවා.) මේ දේශීය ක්‍රමය චිකිතාවන් ආයුර්වේද චිකිත්සාවන් වලට වඩා යම් තරමක් වෙනස්.
මේ සියල්ලම ප්‍රායෝගික පුහුණුවටත් සායණික පුහුණුවටත් යටත්. මේ යටතේ එන සියළුම විෂයන් ප්‍රායෝගිකව සායණික පුහුණුව ලබමින් ඉගෙනගත යුතුයි.
මේ කොටසටම අයත් තවත් එක් විෂයක් තමයි අෂ්ටාංග ආයුර්වේදය හෙවත්,
1.කාය චිකිත්සාව Medicine/
2. ශල්‍ය චිකිත්සාව Surgery
3. ශාලාක්‍ය E.N.T. (Ear, Nose, Throat)
4. අගධ තන්ත්‍රය Toxicology
5. රසායන තන්ත්‍රය Vitamin logy
6. වාජීකරණ තන්ත්‍රය Treatments for Infertility and sex
7. කෞමාරභෘත්‍යය හෙවත් ලමා සහ වනිතා රෝග. යන මේ විෂයන් අධ්‍යනය කල යුතුයි. Pediatrics , Gynecology and Obstetrics
8.භූත විද්‍යාව Para Psychology
මේ යටතේ, පෙර නම් ඉගැන්වීම් කර තිබුනත් අද යම් හැදින් වීමක් පමණයි කරන්නේ. මෙයට අයත් වන්නේ. ජ්‍යෝතිෂය. අපේ දේශීය යම් යම් යකදුරුකම් වැනි දේයි. නමුත් අද මේ ගැන අධ්‍යනය කිරීමක් නැහැ. මම නම් ඒ ගැන දුක් වෙනවා.

3. උද්භිද විද්‍යාව (Botany) සහ ආයූර්වේදීය උද්භිද විද්‍යාව. මෙකෙදි සියළුම ඖෂධීය ශාඛ සම්බන්ධව නිවැරදි දැණුමක් ලබා දෙනවා. ප්‍රායෝගික පුහුණුව සහිතව.

තුන්වෙනි කොටස විදියට එන්නේ බටහිර වෛද්‍ය විද්‍යාවට අයත් විෂයන් අධ්‍යනය.
බටහිර වෛද්‍යවරයෙක් ඉගෙනගත යුතු
ඖෂධවේදය, Pharmacology
ව්‍යාධිවේදය, Physiology
ජෛව රසායන විද්‍යාව, Bio Chemistry
භෞතවේදය Pathology
කියන විෂයන් ඉගෙනීමට වෙනවා. මේවා පිළිබඳ ගැබුරු න්‍යායික පුහුණුවක් ලබා දෙනවා.

අනිත් කොටස වන පෙරදිග දර්ශනය කියන විෂයත් ආයූර්වේදය හැදෑරීමේදී ඉතාම වැදගත් වෙනවා. මෙහිදී පෙර ඉන්දියානු සමාජයේ තුබූ නොයෙක් දාර්ශනික මතවාදයන් පිළිබඳ ඉගෙනීමට ලැබෙනවා. මෙහිදී ෂඩ් දර්ශනය, වෛෂේශික දර්ශනය, සාංඛ්‍ය දර්ශනය, පදාර්ථ විඤ්ඤාණය, පංච වාදයන් වැනි විෂයන් ඉගෙනීමට වෙනවා.

මේ විෂයන් වසර පහක් ඉගෙනීම ලබා, ප්‍රායෝගික පුහුණුව, සායණික පුහුණුව සම්පූර්නකල පසු අවසාන විභාගය සමත් වී වසරක වෛද්‍ය පුහුණුවකින් පසු වෛද්‍ය සභාවේ ලියාපදිංචිය ලැබෙනවා. මේවායේත් වෙනස් වෙනස් තත්ව තිබෙනවා. මා ඒ ගැන කලින් ලියා තිබෙනවා.

කෙසේ හෝ මෙවැනි අධ්‍යාපනයක් වසර පහක් ලැබීමෙන්ද ලියාපදිංචි සහතිකය ලැබීමෙන්ද සුදුසුකම් ලබන ආයුර්වේද වෛද්‍යවරයාට ඊට පසු තවත් ඉහලට හැකි නම් ඉගෙනීමට හැකියි. ඒ සඳහා ක්‍රම කීපයක් තිබෙනවා. මුලින්ම
1. Post Graduate Diploma
2. M. Phill
3. Phd
නැතහොත්
1. Post Graduate Diploma
2. M.D.
ලෙසත් ඉගෙනීමට හැකියි.මෙහිදී බටහිරට වඩා වෙනස්කම්ද තිබෙනවා. යමෙක්ට දාර්ශනික විෂයන් මඟින්ද තම සුදුසුකම් අවශ්‍ය නම් ලබාගත් හැකියි. තවත් යමෙක්ට අවශ්‍ය නම් සායනික පර්යේෂණ මඟින් ඉදිරියට යා හැකියි.

දැනට ඇති ආයූර්වේද විශ්වවිද්‍යාල අධ්‍යාපන ආයතන තුනේම සුදුසුකම් ලංකාවේ මෙන්ම ඉන්දියාවෙත් ඉහලින්ම පිලිගන්නවා. ඒ වගේම දැන් බටහිර රටවල වෛද්‍ය විද්‍යාල තමන්ගේම ආයූර්වේද දෙපාර්තමේන්තු ඇති කිරීමට උනන්දුවක් තිබෙනවා. ඒ නිසා බුද්ධි ගලනයට අනාගතයේදී ආයුර්වේදෙත් එක් වෙයි.

මට මෙතනදි කිව යුතු දේ මේකයි. ඔබ බලයි මෙතරම් දේ ඉගැන්වෙනව නම් ඇයි ලංකාවේ ආයුර්වේදෙ මෙතරම් පහලින් තිබෙන්නේ කියලා. ඇත්තෙන්ම එහෙම දෙයක් නැහැ. නමුත් අපේ රටේ තාමත් තියන්නේ සුද්ද හදපු නීති. අනික ආයූර්වේදෙට අමාත්‍යාංශයක් තිබුනට ඒක තියන්නේ අමාත්‍යාංශ ලිස්ට් එකේ අන්තිමට. බෙදලා බෙදලා ඉතිරිවෙන යමක් වෙතොත් මේකට ඉන් ටිකක් දෙනවා. අනික මේ ඉන්න නිලධාරීන්ට කිසිම දැනුමක් නැහැ ආයූර්වේදෙ කියන්නේ මොකක්ද කියලා.

අනාගතය බොහෝ පැහැදිලි විෂයක් තමයි ආයූර්වේදෙ කියන්නේ. නමුත් අපි මෙකෙන් ගන්න ප්‍රතිලාභයක් නැහැ. අපි කීප දෙනෙක් අපේ සුළු දැණුමෙන් කීයක් හරි හොයා ගන්නවා ඇරෙන්න අපෙන් රටට ලබා ගන්න දෙයක් නැහැ. අපි යමක් කරන්න හදද්දි වෙන්නේ ඒකට පොල්ල වැටෙන දෙයක් මුලට එනවා. ආයූර්වේදෙ කිසිම දුර්වලකමක් නැහැ. එහිත් වෙනත් විද්‍යාවන් වගේම යම් යම් සීමා තියනවා. හැකි නොහැකියාවන් තිබෙනවා. නමුත් හැකි ටිකෙන්වත් රටට මින් ප්‍රයෝජනයක් ගත යුතුයි. එහෙම නොවුනොත් තව ටික කලකින් බටහිර රටවලින් මෙහෙට ආයූර්වේද වෛද්‍යවර ඒවි. එහෙමත් නැත්නම් අපිට ආයූර්වේද බෙහෙත් ගන්න බටහිරට යන්න වෙයි. ඒක නම් ස්තිරයි.

හැබැයි රාජ්‍ය අංශයෙනුත් ආයූර්වේදෙට යම් නොසැලකීමක් තිබෙන බව මම නම් කෙලින්ම කියනවා. කලයුතු වන්නේ අමාත්‍යාංශයක් සැදීම නෙමෙයි. සෞක්‍යයට කොහෙද මොන රටේද අමාත්‍යාංශ දෙකක් තිබෙන්නේ? තිබිය යුත්තේ එක් සෞඛ්‍ය අමාත්‍යාංශයක් පමණයි. මේකෙන් වෙලා තියන්නේ රටේ සෞඛ්‍යට වෙන් කරන මුදලින් ඉතාම සොච්චමක් ආයුර්වේදෙට ලැබෙනවා. එතැන ඉන්න නිළධාරි උත්තමයන්ට පඩි ගෙවලා, තව තව වැඩ කරලා ඉතිරි වෙන දේ තමයි ආයූර්වේදෙට ලැබෙන්නේ. ඒකෙන් මොනවා කරන්නද ?

කිසිම පර්යේෂණයක් නැහැ. අපේ හැකියාව තිබුනට මදි ඒවා මාකට් කල යුතුයි. කෝ ඒකට සැලැස්මක්. මෙන්න මේවා වෙනස වෙනව නම් ආයූර්වේද වෛද්‍ය වරයාට පුළුවන් වෙනවා යම් සටනක් දීල තමන්ගේ විද්‍යාව උසස් බව පෙන්වන්න. දැන් මෙහෙම නම මේක වෙන්නෙ නැහැ. පුද්ගලික අංශෙ ඉන්න අය ඉහලට යන්නත් රාජ්‍ය අංශය පහලට යන්නත් හේතුව ඒකයි. ලංකාව ආශ්චර්ය්‍යය කරන්න ඕනෙනම් අපේ දෙවල් ඉදිරියට ගන්න. මෙහෙම හිතනකන් මම හිතන්නේ නැහැ අපිට ආශ්චර්ය්‍යය වෙන්න පුළුවන් කියලා.


මම අද මේ මාතෘකාවට පැමිණියේ දැන් උ/පෙ කරලා ඉන්න දරුවන්ගේ හිත සුව පිණිසයි. ඔබ ආයූර්වේදෙට තේරුනොත් බය නැතුව එන්න. අපි ඔබට උදව් කරන්නම්.

ආයුර්වේදය ගැන ලියූ කලින් ලිපි.

Saturday, September 24, 2011

විශ්වාරම්භය තුන ප්‍රකෘති සහ පුරුෂ……….

බොහෝ දිනක් අපි අපේ සුපුරුදු මාතෘකා වලින් බැහැරව සිටියා. ඒ මගේ පුද්ගලික දිවියේ ඇති වූ වෙනස් කමක් නිසා බව ඔබ සැම දන්නවා.

විශ්වාරම්භය පිළිබඳ බටහිර මත ගැන දැන සිටි ඔබට මම පෙරදිග මතයන් ගැන යම් අගැයීමක්, දැණුමක ලබා දෙන්නයි උතසාහ ගත්තේ. නමුත් මේ අනපේක්ෂිත තත්ත්වය නිසා එහි යම් බිඳ වැටීමක් සිදු වුනා. ඒ ගැන මගේ කනගාටුව.

මේ පෙරදිග දර්ශනය පිළිබඳව මා සිතූවාට වඩා මට ප්‍රතිචාරයන් ලැබුනා. සමහර මගේ මිත්‍රයන් මේ බ්ලොගය කියවන අය මට මේ ගැන දිගටම ලියන්න මාව දිරිමත් කලා. ඒකට හේතුව වුනේ අපේ විද්යාවන් පිළිබඳ අපි සිටින්නේ බොහෝ දුරස්ථව. කොටින්ම අපි ඒවා මිත්‍යා වලට දමා තිබෙනවා. නමුත් මම ඔබට මේ ලිපිපෙල අවසානයේ වටහා දෙන්නම් මේ බටහිර, පෙරදිග, සියළුම දෙනා පවසා ඇත්තේ එකම දෙයක් පිළිබඳව. මේවායේ ඇති ප්‍රශ්නය තමයි බටහිර සියල්ලම නිර්මාණාත්මකව වෙලදපොලට එනවා. නමුත් අපේ දෙවල් එහෙම නැහැ. අපේ අරුණි ශපීරෝ කියන මගේ ජ්‍යේෂ්ඨ සොයුරිය කියන විදියට එහි ඇති වරදක් මමත් දකින්නේ නැහැ. ඒත් දැන්වත් අපිත් මේ දේවල් පිළිබඳ ලෝකය දැණුවත් කල යුතුයි. මේ මාගේ පුද්ගලික මතයයි. අනික් කාරනේ මේ දෙවල් යම් මූල්‍ය අගැයීමකට ලක් කරන එක, මේවායේ චිර පැවැත්මට හේතු වෙයි කියලාත් මම හිතනවා.

ඒ නිසා අද පටන් මම එනවා විශ්වාරම්භයට......

අපි දැන් බලමු විශ්වාරම්භය ගැන තුන්වන සාකච්ඡාව. මම මේ මාතෘකාව ඉතාමත් දිගට යන නිසා කොටස් ගනනාවකින් තමයි කථා කරන්නේ.

දැන් එහෙනම් විශ්වාරම්භය තුන ප්‍රකෘති සහ පුරුෂ……….

ප්‍රකෘති.
අපි මුලින්ම කථා කලා ප්‍රකෘති කියලා කියන්නේ සත්ව රජස් තමස් කියන මානසික දෝෂ වල සාම්‍යාවස්ථාව කියලා. පෙර විසූ ඉතාම බුද්ධිමතුන් කොටසක් වූ වේදාන්තිකයෝ මායා යන නමින් ගත්තේද මේ මානසික ගුණවලම යම් යම් අවස්ථාවන් තමයි. මේ අවස්ථාවම න්‍යායිකයන් විසින් සහ වෛශේෂිකයෝ පරමාණු ලෙසත් ව්‍යවහාර කලහ. මෙය කාර්ය්‍ය නිපැදෙන ක්‍රියාකාරීත්වයෙන් තොරයි. ඒ නිසා ප්‍රභේද දෙකකි.

1. ව්‍යක්ත -
පුරුෂ හාසංයෝගයෙන් ක්ෂෝභයට පැමිණි බුද්ධියාදී වශයෙන් පරිණාමයට පත්වන ගුණත්‍රය ව්‍යක්ත වේ. එනම් ඒවා ඉන්ද්‍රියකින් විෂය කරගත හැකි නිසාය. ව්‍යක්තය භේද විසි තුනකි.

මහත් - 01
අහංකාර - 01
ඉන්ද්‍රිය - 11
පංචතන්මාත්‍ර - 05
පංචමහාභූත - 05

2. අව්‍යක්ත -සත්ව, රජස්, තමස්, යන ගුණත්‍රයේ සාම්‍යයාවස්ථාවයි. මෙම ගුණත්‍රය චක්ෂුරාදී ඉන්ද්‍රියයන්ට විෂය වීමක නැත.
මේ තත්වය මූල ප්‍රකෘතියයි.

සාංඛ්‍ය දර්ශනයේ එන ප්‍රකෘතිය තරම් විස්තර කිරීමට අපහසු දර්ශනයක් තවත් නැත. මෙය නිත්‍ය වූ, අවිඤ්ඤාණික, අචේතන, ජඩ පදාර්ථයකි. ජඩ යනු මුළු මහත් විශ්වයේම පැතිරුනු යනුයි. එනම් විශ්ව ආරම්භයේ මූල පදාර්ථයි. එම නිසා විශ්වයේ ඇති හැම වස්තුවක් කෙරෙහිම මේ ප්‍රකෘති බලපායි.

මෙය හොදින් තේරුම් ගන්න. විශ්වයේ මූල ධාතුව ප්‍රකෘතිය වන අතර විශ්වයේ ඇති හැම වස්තුවක්ම එහි විකෘතියකි. එනිසා මේ සියල්ල ව්‍යක්තයි. ප්‍රකෘතිය අව්‍යක්තයි.

විශ්වයේ ඇති සියළු වස්තු කොටස් තුනකි.
1. සීමිත
2. පරිමිත
3. අස්වතන්ත්‍ර

එම නිසා සියළුම ඒ වස්තූන්ගේ මූල කාරණය හෙවත් ඇති වීමට හේතු වූ කාරණය,
1. අසීමිතයි
2. අපරිමිතයි
3. ස්වතන්ත්‍රයි

එම නිසා ඒ අසීමිත, අපරිමිත, මූල කාරණය ප්‍රකෘතිය නම් වේ. සියළුම වස්තු සැප, දුක් හා මෝහය ඇති කරන සුළු වේ. මේ කරුණ නිසා ඉහත දැක්වූ ද්විවිධ (ව්‍යක්ත සහ අව්‍යක්ත ) භේදයන්ගේ ඝටනාව ඇති එක් මූල කාරනයක් අවශ්‍යයෙන්ම ඇති විය යුතුය. ඒ ඒකත්වය හෙවත් ගුණයන්ගේ අප්‍රකට අවස්ථාව, අව්‍යක්ත හෙවත් ප්‍රකෘතිය නමින් හැදින්වේ.

කාරණයක් ඇති කල්හිම කාර්යයක පැවැත්ම සිදුවේ. කාර්යය සිදුවන ශක්තිය එහි අව්‍යක්ත අවස්ථාව වේ. එහෙයින් සියළුම කාර්යයන්ගේ උත්පාදක වූ කිසියම් අව්‍යක්ත තත්ත්වයක් ඇතැයි සිතීමට හැකිය. එම කාර්යයන්ගේ අව්‍යක්ත අවස්ථාව ප්‍රකෘතිය වේ.

දැන් ඔබ දන්නවා අපි මේ කථා කලේ අභෞතික වූ, සංකල්පීය තත්වයන් කීපයක් ගැන බව. මෙහිදී කෙටියෙන් කිව්වොත් මේ සිද්ධ වෙන්නේ අභෞතික වූ අනුභූතියක් භෞතික ද්‍රව්‍යක් බවට පත් වීමයි. ඒ මේ අවස්ථාවෙත් තවම අපි ඉන්නේ අභෞතික තත්වයක. කොටින්ම තාම විශ්වය ඇරබිලා නැහැ. දැන් මේ සූදානම ඒකට.

ඊලඟට අපි බලමු මේ අභෞතික වූ අනුභූතීන් කොහොමද බෞතික බවට පත් වෙන්නේ කියලා. එන සතියේ ඒ කොටස එනකන් අපි හෙට අනිද්දට වෙන මාතෘකාවකින් මුන ගැසෙමු.

Friday, September 23, 2011

පියා ගැන අවසන් ලිපිය.

පසු ගිය කරදර නිසා මගේ බ්ලොග් එකත් පාළුවට ගියා. නමුත් මම දන්නවා ඔබ මගේ ප්‍රශ්නවලදී මා අත නොහැර සිටි බව. ඒ නිසා මගේ යුතුකම මේ බ්ලොගය නිසි සේ පවත්වා ගැනීම. මම එය අමතක නොකරන බව කියමි.

කෙසේ වෙතත් පියාගේ අභාවය සිදු වූයේ මගේ විශාල වශයෙන් කාර්ය බහුල සමයක. ඒ නිසා සියළු වැඩ සති දෙකක් පමන නැවතුනා. නැවතත පැමිණි ගමන් මම මගේ අධ්‍යාපන කටයුතු ඇරබුවා. දැන් ඒවා නැවතත් යථා පරිදි සිදු වෙනවා. මගේ රෝගීන්ට මම වසර 1997 සිට මේ දක්වා කිසිම දිනක පොලු තබා නැහැ. සති ගනන් විදේශ ගතවීම වලදීත් සියල්ල අකුරට සැලසුම් කරනවා. නමුත් මෙවර ඉතාමත් කෙටි කලකින් සියළු වැඩ නවතා දැමුවා. සියළු දේට තිබුනේ පැය කීපයයි.

පියාගේ කැමැත්ත පරිධි සියල්ල ශිදු විය යුතු වුනා. මට පියාගේ අභාවය ගැන ගම්පහ රෝහල ලඟම සිටින මගේ ලොකු නංගි දැනුම් දෙන විට 2011/09/09 රාත්‍රී 11.45ට පමන ඇති. නමුත් මම නුගේගොඩ සිට අදාල ස්ථානයට හරියටම විනාඩි 30 වගේ කාලයකින් පැමිණියා. වාසනාවකට නිසිලෙස මුදල් මාලඟ තිබුනා. ඒ මොහොතේම මගේ බාල සහෝදරයාට මව රැගෙන එන ලෙස පවසා මම දේහයේ කටයුතු කලයුතු ආකාරය සොයා බැලුවා. පියාගේ කැමැත්ත වෛද්‍ය විද්‍යාලයට තම දේහය ලබා දීමටයි. මම අද ලියන්න යන්නේ අන්න ඒ කාරනාව පිළිබඳවයි.

මම වෛද්‍ය ක්ෂේත්‍රයට සම්බන්ධ වෙන්නේ 1988 පමන සිට. එදා සිට අද දක්වා මම දන්නවා වෛද්‍ය සිසුන්ට මෘත දේහයක ඇති වැදගත්කම. මූලික වසර වලදී ලබා දෙන වෛද්‍ය අධ්‍යාපනයේ කොටසක් තමයි මෘත දේහ ක්‍රමාණූකූලව හැදෑරීම. මෙමගින් විශාල දැනුමක් වෛද්ය සිසුවාට ලැබෙනවා. නමුත් අවාසනාවට අපේ වෛද්ය සිසුවන්ට තිබෙන මෘත දේහ ප්‍රමාණය ඉතාමත් සීමිතයි. ප්‍රායෝගික පුහුණු සැසි වලදී සිසුන් කණඩායම් කීපයක් එකට දමා ඉගැන්වීමට තරම් මේ හිඟය බහුල බව තමයි මම දන්නේ. මම සිසුවකුව සිටි අවධියේ අපි මෘතදේහ එකතු කිරීමේ ව්‍යාපෘතියකුත් කලා මට මතකයි. රෝහල්වල වගේ තැන් වලට ගිහින් බැනුම් අසාගෙන තමයි ඒක කලේ.

මුලින්ම මම හරියටම පාන්දර තුනට පමන ගියා මට ගෙදර වගේ පුරුදු එක් වෛද්‍ය පීඨයකට. එතැන මට මුණ ගැසීමට කෙනෙක් තබා ප්‍රධාන ගේට්ටුවේ ආරක්ෂකයාවත් නැහැ. මම ඒ සැරේ ඇතුලට ගිහින් බැලුවා මෙලෝ යකෙක් නැහැ. වන්නාටම කියලා ඉතාමත් අකමැත්තෙන් මගේ මිතුරියකට කථා කලා වෙලාව පාන්දර 3.10 පමණ ඇති. ඇයගේ නම මට සටහන් කිරීමට හැකියාවක් නැහැ. හේතුව අද මෙරට සිටින ඉතාමත් ජ්‍යෙෂ්ටම කථිකාචාර්යවරියක් සැමියාත් මගේ ඉතාමත් හිතවත් මිතුරෙක්. දක්ෂ බටහිර වෛද්‍යවරියක්. ඔවුන් නිදි ඇදෙන් නැගිටුවලා මේ විස්තරේ කිව්වහම ඇය පොරොන්දු වුනා මගේ පියා නීත්‍යාණුකූලව කලින් පෝරම පුරවා එම වෛද්‍ය විද්‍යාලයට දේහය ලබා දීමට කැමැත්ත ප්‍රකාශ කර ඇති නිසා හෙට උදේම එය කරමු කියා. කෙසේ වෙතත් ඇය උදේ 8 ට මට අමතන බවත් මට දැන් වූවා. දැන් ඒ බර මගේ සිතේ නැහැ. මවත් සතුටු වූවා පියාගේ කැමැත්ත එය නිසා.

කෙසේ හෝ අපි දැන් උදේ අට වන විට ගමේ පන්සලේ නායක හිමියන් ඇතුළු ලඟම ඤාතීන්ගෙන් පැමිණිය හැකි කීප දෙනෙක් දේහයේ ආගමික කටයුතු සූදානම් කරමින් සිටින විට මගේ මිතුරිය හරියටම උදේ 8.05 මට කතා කරනවා.

ඇයගේ ස්වරය ඉතාම ශෝඛාකූලයි. මට සිතුනා ප්‍රශ්නයක් බව. ඈ මට පැවසුවේ "වෙදනා අද නම් මාර වැඩක් වෙන්නේ මෙහේ මයිනර් ස්ටාෆ් වැඩ වර්ජනයක් මුන් මේ වැඩේ කරන් නැහැ" මොකද කරන්නේ. මට උන් හිටි තැන් අමතක වුනා. ඉතාමත් අසරන වුනා. ඇය මට පොරොන්දු වුනා කෙසේ හෝ අපි බලමු කියා. එවිට අපි අපේ පුද්ගලික හැදිණීම උඩ ලංකාවේ අපට යා හැකි දුරකින් පිහිටි සියළුම දේශීය සහ බටහිර වෛද්ය විද්‍යාලවලට කතා කලත් ඔවුන්ට ඒ වැඩය මා වෙනුවෙන් කර දීමට අවශ්‍ය වුවත් මේ වර්ජනය එයට බාධාවක් වූවා.

උදේ 9.30 වෙනකනුත් මේ ප්‍රශ්ණය විසඳාගැනීමට හැකියාවක් ලැබුනේ නැහැ. මාත් මගේ බිරිදගේ සොහොයුරාත් දන්න සෙල්ලම් සියල්ලම දැම්මත් අවසන අපි පරාද වුනා.

මේ අවස්තාවේ තමයි මගේ තවත් මිතුරෙක් බටහිර වෛද්‍යවරයෙක් පොඩි හෝඩුවාවක් දුන්නේ. මේ වෙනකොට අපි හිටියේ ලංකාවේ බැරිනම් වෙන කොයි ලෝකෙක හරි වෛද්‍ය විද‍යාල සිහි කරමින් අපිට ඉක්මණින් ලඟා විය හැකි. මොකද දේහයේ කිසිම වෙනසක් නොකර භාරදීම ඉතා වැදගත් නිසා. කෙසේ හෝ මගේ මිතුරා දුන්නා යම් දුරකථන අංකයටත් වහාම කථා කරන්න කියා. ඒ වෛද්‍යවරයාට අපි වහාම කථා කලා. වැඩේ හරි. එතුමා අපිට දැන්නුව මරන සහතිකයේ එතුමාලාගේ වෛද්‍ය විද්‍යාලෙ නම සඳහන් කරගෙන් එන්න කියා. ඒ වැඩේට අපිට විනාඩි කීපයයි ගියේ. කෙසේ හෝ දැන් තමයි අපිට යම් සැනසීමක් ලැබුනේ. අපේ පියා කවදාවත් තමන්ගේ සිතැඟි අනුව අපිව පාලනය කල කෙනෙක් නෙමෙයි. අපිට උපරිම නිදහස තිබුනා. ඒ නිසා මට මේ දෙ කර ගන්න බැරි වුනානම ජීවිතේටම මට බලපානවා.

අපි මේ කියන වෛද්‍ය විද්‍යාලයට ලඟා වන විට අපිව හොඳින් පිලිගත්තා. කිසිදා නිකමටවත් ගොඩ වී නැති තැනකට තමයි පියාගේ දේහය දෙන්න සිදු වුනේ. ඒ ගැන කිසිම ප්‍රශ්නයක් මට නැහැ. අවශ්‍ය දෙ කල එක ගැන යම් තෘප්තියක් පමණයි ඇත්තේ. කොහොමත් මට ඔය පංති භේද අර භේද මේ භේද ඇත්තේ නැහැ.

ඔබ දන්නවද මේ වෛද්‍ය විද්‍යාලය කුමක්ද කියා,

ඒ තමයි මාලඹේ පුද්ගලික වෛද්ය විද්‍යාලය.

ප. ලි.
හොඳින් තේරුම් ගන්න මම මේ හරහා කාටවත් සිත් රිදීමක් ඇති කරන්නවත් යම් විවේචනයක් ඇති කරන්නවත් උත්සාහ කලේ නැහැ. මට අවශ්ය වූයේමේ ක්‍රමය සහ එහි ඇති අමානුෂික බව පෙන්වා දීමටත් මගේ අත් දැකීම බෙදා හදා ගැනීමත් පමණයි. එසේ වැරදි වැටහීමක් ඇති වූනම දහස් වාරයක් සමාව ඉල්ලනවා.

ප. ප. ලි.
විශ්වාරම්භයට දැන් යමු ඉක්මනින්ම...........

Wednesday, September 21, 2011

ඔබ සැමට, මාගේ දිවියේ ඉතාමත් අපහසු අවස්ථාවක මට ඔබ ලබා දුන් දිරිය ඉතාමත් ස්තුති පූර්වකව භාරගනිමි.

මගේ පියා මට මව තරම් සමීප පුද්ගලයකු නොවූ නිසා මට මෙතරම් ඔහුගේ වියෝව දැනේ යැයි මම මොහොතකටවත් නොසිතුවෙමි. නමුත් අද මට එය එසේ නොවේ. "පියෙහි විප්පයෝගෝ දුක්ඛෝ" යන බුදු වදන මට දැන් හොදින් වැටහේ. මගේ පියා ඉතාමත් උන්නතිකාමී පුද්ගලයෙක් වූවත් මව ඉතාමත් අවංක ගුණ ගරුක කාන්තාවක් වූවාය. උපතින්ම ඤාතීන් වූ ඔවුන් වසර 1966 දී විවාහ වී ඇත්තේ තම තනි කැමැත්තටයි. නමුත් තම පවුලට මගේ දෙමව්පියන් විශාල සේවයක් කර ඇත. තම නැඟනියන්, මලණුවන්, ආදීන්ගේ රැකියා, විවාහ ආදිය තනිවම කර දී ඇත්තේ මගේ පියායි. නමුත් මෑතක් වන තුරුම ඔහුගත් හදිසි විවාහ තීරනය ගැන නෑසියන් අතර තිබුනේ පහන් හැගීමක් නොවේ. ක්‍රමයෙන් අප වැඩෙත්දී මවට අපගෙන් ලැබෙන රැකවරනය හමුවේ පසු බා ගියත් එම නෑසියන් මගේ පියා සතුව තිබූ මගේ මව විවාහ කර ගැනීමේ දැඩි උවමනාව නිසා හැර දමා ගිය ව්‍යාපාර ගැන නන් දෙඩූහ. නමුත් පියා ඒ ගැන සිතූයේ තමන්ට එම වස්තුව මව තරම් නොවටිනා බවයි. එම තීරනයේ ඇති නිරවද්‍යතාවය වයස අවුරුදු 74 වී ජීවිතයෙන් සමු ගන්නා විටත් පසක් වන්නට ඇති බව මට හැඟේ. මගේ මව හා විවාහ වන්නට පෙර මපියා අති සාර්ථක ව්‍යාපාරිකයෙකි. තුරුණු වියේදී කාර් රේස් ආදියට සහභාගී වූ දැඩි විනෝදකාමියෙක් විය. නමුත් උගත් කාන්තාවක් වූ මගේ මවගේ ඇසුර නිසා වේගයෙන් මපියා වෙනස් වී ඇත. පසු කාලීනව ඔහුගේ දිවියේ තිබුනේ තම කුටුම්භය රැකීමේ අරමුණ පමණක් බව මම දනිමි. යොවුන් වියේදී දැඩි සේ මිතුරන් ඇසුරට යොමු වී තිබුනත් පසු කාලීනව මම දැනුවත්ව ඔහුට අතිෂයින් සමීපයන් කීප දෙනෙකු හැරුනු විට මිතුරන් සිටියේ නැත. හැම විටම තවකෙකුට උපකාරයක් කල හැකි නම් ඉන් තමාට වන පාඩුව ඔහු තැකුවේ නැත. 1977 පෙරලියත් සමඟ මෙරට තමන් කල සියල්ල හැර දමා විදේශ ගත වූ ඔහු නැවත මෙරට නවතින්නේ මගේ සහ මගේ සහෝදර සහෝදරියන්ගේ දැඩි බලපෑම නිසා 1999 පමණයි. වසරකට මාස කීපයක් මෙරට ගත කරන ඔහු අපේ අධ්‍යාපනය ගැන කිසිත් නොදැන සිටියේය. ඔහුට අවශ්‍ය වූයේ අප සැම දෙනා පංතියේ පලමු වැනියා වීම පමණි. මට දැඩි සේ ආදරය කල මපියා තමන් මෙරටට පැමිණෙන විට අපට ගෙනෙන තෑගි බෝග වලට අමතරව අනෙක් අයට සඟවා මට විශේෂ යමක් නිතරම රැගෙන ආවාය. මුලින් මගේ විවාහයට එතරම් කැමැත්තක් නොපෙන්වුවත් ඒ ගැන යමක් කෙලින් මට කිසිදා පවසා නැත. නමුත් පසුව මගේ බිරිද ඔහුට නියම යෙහෙලියක්ම විය. මට කථා නොකලත් ඇය සමඟ කථා කිරීමට අමතක කලේ නැත. කෙසේ වුවත් විශාල කළු පැල්ලම් කීපයක්ද ඔහු තම දිවියට එක් කර ගත්තේ අප සැම විශාල දුකට පත් කරවමිනි. මගේ සහ පියාගේ හැල හැප්පීම් වලට එය හේතුවක් විය. පසු කාලීනව එම සියළු ප්‍රශ්න වලින් ඔහු නිදොස් විය. මගේ මව මේ හැම විටම ගත්තේ පිය පාර්ශ්වයයි. කිසිවකුගේ බහකට ඇය කන් දුන්නේ නැත. පියාට දැඩි සේ ආදරය කල ඇය හැම විටම ඔහු පසු පසින් විය. දැඩි හිතැත්තෙකු වූ ඔහුව පාලනය කිරීම ඉතා අපහසු වුවත් මට සහ මවට ඔහු මෙල්ල කිරීමේ හැකියාව තිබිණි. මගේ වචනයකට පසු බා යන ඔහු මවට නිතැතින්ම මෙල්ල විය. සැමට හිත හොඳ මිනිසෙකු වූ ඔහුට තේරෙන ලෙස ලෝකය හැදින සිටියාය. ඔහුට අවශ්‍ය වූයේ අප මහා මිනිසුන් කිරීමටයි. නමුත් මාගේ ගමන් මඟට කිසිවක් නොකීවා පමණක් නොව ඒ දෙස උපෙක්ෂාවෙන් බැලීමටත් පුරුදු විය. කැපුවත් කොල ඔහු යුධ ජයග්‍රහනයත් සමඟ නිල් පාටින් බැලීමට යොමු විය. අප ඒ ගැන ඔහු හා කථා නොකල අතර දිවියේ අවසන ඔහු හැම දෙයකින්ම නිදහස් මිනිසෙකු ලෙස තම ක්ෂාන්තිය සොයා ගිය බව මට දැන් සිතේ. තනිව මගේ මව හා ඇරඹූ ඔහුගේ දිවිය දරුවන් සතර දෙනෙක්, බෑනන් යෙහෙලියන්, මුනුබුරු මිනිබිරියන්, ආදීන් අතර සතුටින් ගැවසුනත් අද ඔබ අප අතර නැත. ඔබද මෙදියත උපන් තවත් එක් මිනිසෙකි ඒ නිසා හොඳ නරක සම සමව ඇති අප හැම මෙන් ඔබද අතිශයින් සාමාන්‍ය තවත් එක් මිනිසෙකි. තවත් මිනිසෙක් ලෙසම ඉපිද අමා මහ නිවන කරා යන්නට ඔබ අප වෙනුවෙන් කල උත්තම කාරියම වුවත් සෑහේ පියාණෙනි.

Monday, September 12, 2011

පියානෙණි ඔබට නිවන් සුව!!!!!!!!

මම පසුගිය දිනවල බ්ලොග් අවකාශයේ වැඩිය පෙනී සිටියේ නැහැ. ඉතාමත් හදිසියෙන් ලියන නිසා කෙටියෙන් ලියන්නම්. දැනට වසර ගනනාවක සිට මගේ පියා සිටියේ අසනීපයෙන්. ඒත් ගිය සෙනසුරාදා පාන්දර යාමේ ඔහු අපෙන් සමු ගත්තා. ගිය සදුදා උදේ අසනීප වෙලා රෝහල්ගත කලා. නමුත් මගේ පියාට ජීවිතය උරුම වෙලා තිබුනේ සෙනසුරාදා පාන්දර යාමය වනතෙක් පමණයි. ඔහුගේ දැන් කාලයක සිටම දැඩි ඉල්ලීම වෙලා තිබුනේ මියගොස් පැය කීපයක් ඇතුලත අවසන් කටයුතු සිදු කරන්නත්, දේහය වහාම වෛද්‍ය විද්‍යාලයකට බාරදෙන්නත්, කෙසේ හෝ ඒ සියළ්ය්ම වැඩ මවිසින් සිදු කලා. සත් දින්ම දානය හා බණ සිදු කිරීම මේ සතියේ අවසන් වූ වහාම මම නැවත බ්ලොග් අවකාශයට එනවා. එතෙක් සමා වෙන්න. මේ සිද්ධිය සම්බන්ධ අතුරු කථා කීපයක් ඉක්මනින් ගෙන එන්නට මම බලාපොරොත්තු වෙනවා. ඊට පසුව අපේ සුපුරුදු මාතෘකා........

Monday, September 5, 2011

වත්තල පුරාණය.

අවබෝධ කර ගැනීම ඉතාම අපහසු මාතෘකාවක් ගැන එක දිගටම ලිපි දෙකක් ලියූ නිසා මම කල්පනා කලා තවත් සරල ලිපියක් ලියන්න.

ඊලඟට අපේ සුපුරුදු මාතෘකාව නැවත එනවා ……………………………………...

මම මේ ලිපිය ගැන සිතා සිටියේ බ්ලොග් කරණයට පැමිණීමටත් ඈතක සිටයි. එනම් මා වයස අවුරුදු 05 පමන සිට තුරුණු විය දක්වාම ජීවත් වූ ප්‍රදේශය වත්තල වීම නිසාත්, මගේ ජීවිතයේ සුන්දර මතකයන් බොහෝමයක් බැඳී ඇත්තේ වත්තලත් සමඟ. ඒ නිසා මේ මගේ ගම නොවූවත් මා පෝෂණය කල පෙදෙස වූ බැවින් මවිසින් ප්‍රදේශය වෙනුවෙනුත් යමක් කල යුතුයි.

මගේ මේ ලිපිය එම හැගීම නිසා ලියවෙන්නක්.........

කොළඹ මීගමුව ප්‍රධාන මාර්ගයේ 5 වැනි සහ හය වැනි සැතපුම් කණු ආශ්‍රිතව වත්තල ග්‍රාමය පිහිටා ඇත. වනවාසල, තෙලඟපාත, හුණුපිටිය, මාබෝලේ, වැනි අනුග්‍රාමයන් වලින් වටවී ඇති වත්තල අද වන විට ඉතා ජනාකීර්ණ නගරයකි. බහුතරය ක්‍රිස්තු භක්තිකයන් ජීවත්වන ප්‍රදේශයකි. මගේ පැටි විය සහ තුරුණු විය ගෙවුනේ මේ නගරයේ ඇති ප්‍රධානම දෙවස්ථානය වන ශාන්ත ආනා දෙව් මැදුර ආශ්‍රිතවය. මෙය මේ නගරයේ ඇති ප්‍රධානම පූජණීය ස්ථානයකි.

වත්තල නගරයට බටහිරින් මුහුදට සමාන්තරව අතිඅලංකාර කල්‍යාණී නදිය ගලාගොස් සේදවත්ත මෝය හරහා සාගරය හා එක් වෙයි. මෙතැන් සිට රටේ ඉහලට හෙවත් උතුර බලා ආදි කාලීන හැමිල්ටන් ඇල ගලා බසී. මේවා වත්තල බටහිර සීමාව ලකුනු කරයි. අති සුන්දර මුහුදු වෙරල මගේ ජීවිතය සා සමීපව බැදී ඇත.මේ වෙරළට මා ගිය අවසාන දිනය අද මෙන් මට මතකය. ඒ ඉතාම ශෝචනීය ලෙස අපේ කන්ඩායමේ සිටි දක්ෂ සගයෙක් වූ වසන්ත නම් මිතුරා මුහුදට බිලි වීමයි. එතැන් සිට අද වන තෙක් මම මේ වෙරල සීමාවට ගොස් නැත. ඔහු රජ්ජුරුවන්ගේ පාසලේ සිට කොළඹ විශ්ව විද්‍යාලයේ විද්‍යා උපාධියට තේරී සිටියෙකි.

වත්තල ග්‍රාම නාමය සම්භවය පිළිබඳ විවිධ මත ඇතත් මෙහිදී ඒවායි වඩා බහුලව භාවිතාවන මතයන් ගැන කථා කරමු.

1. වත්තල නාමය වත්හල යන වචනයෙන් බිදී ආවාක් සේ බහුලව පිලිගැනෙයි. මෙහි
වත් = වස්ත්‍ර යන අරුතින්ද,
හල = ශාලාව යන අරුතින්ද ගැනිනැයි කියති.
අදද වත්තල යනු පේශ කර්මාන්තයට බොහෝ ප්‍රසිද්ධ නගරයකි. අතීතයේ මෙහි විශාල ඇදුම් කම්හලක් පිහිටා තිබී ඒ අරුතින් වත්හල යන්නද, පසුව "හ" ලොප් වී, "ත" ආදේශ වීමෙන් වත්තල නිපැයිනියිද එක් මතයකි.

2. කේ. ජයතිලක ශූරීන්ගේ අර්ථ දැක්වීම අනුව වස්තු ශාලාව යන්නෙන් බිඳී ආවක් ලෙස සලකයි. මේ අයුරින් තිසර සංදේශය නමැති ග්‍රන්ථයේ සඳහන් වී ඇති බව එතුමාගේ අදහසයි. එම මතයට අනුව,
වස්තු ශාලාව - වත් + හල = වත්හල = වත්තල වී ඇත.

වත්තල ඉතිහාසය සහ සංදේශකාව්‍යය.
වත්තල ඉතිහාසය ගැන මුල්ම සටහන එන්නේ කැලණි තිස් රජ සමයේයි. එම යුගයේ සිදු වූ මහ රහතන් වහන්සේ නමක තෙල් කටාරමේ දමා මැරවීමේ සිද්ධිය ඔබ හැම දන්නවා යැයි මම සිතමි. එම තෙල් කටාරම පිහිටියේ වත්තල තෙලඟපාත නම් ප්‍රදේශයේය. මෙ ප්‍රදේශයේ ඇති සුප්‍රසිද්ධ විහාරස්තානය පිහිටි බිමේලු මෙම ක්‍රියාව සිදු වූයේ. ඒ කෙසේ වෙතත් එම යුගයේ සිදු වූ යම් ගංගාව සම්බන්ධ සිදු වීමක් නම් සිදු වී ඇති බව අප කුඩා වුන් සමයේ මේ ප්‍රදේශයේ තිබූ භූ විෂමතා ලක්ෂන අනුව පැහැදිලිව පෙනුනි. නමුත් අද මේ කිසිවක් හඳුනාගත නොහැකි ලෙස වෙනස් වී ඇත.

නවලෝක ග්‍රාමය ඇති ඔලියාමුල්ල නම් ස්ථානය ඔබ දන්නවා යැයි සිතමි. මෙය ඇත්තේ කොළඹ සිට ජඇල පැත්තට යාමේදී වත්තල හංදියට පෙර හමුවන බස් රථ නැවතුමේදීය. ( ගැමුණු පැලැස් නැවතුමට කලින් නැවතුම.) මේ ස්තානයේ නම අලි ආ මුල්ලයි. ඉතා පෙර යුගයේ පැරන්ණන් ඒ නමින්ලු හැදින් වූයේ. අප ඉහත කථා කල කැලණි තිස් යුගයේදී කල්‍යාණී නදිය ගලා ගියේමේ ඔලියාමුල්ල හරහාලු. අලි ආ මුල්ල වූයේ මේ ගංගා ගැලීම වන විට ගසා ගෙන ආ අලින් මේම ප්‍රදේශයේදී මිනිසුන් විසින් අල්ලා ගැනීමලු. ඒ සමයේ සිදු වූ මහා ජල ගැලීමක් නිසා එම මාර්ගය නැවත වෙනස් වී ගංගාව වෙනත් මගක යන්නට පටන් ගත්තාලු. මම දැක ඇති පිලිවෙලටත් එය යම් තරමකට විශ්වාස කල හැකි සාධක තිබුනා මට මතකය. නමුත් අද මේ ප්‍රදේශය ඉතාමත් ජනාකීර්ණය. කිසිවක් හදුනාගත නොහැකි අයුරින් වෙනස් වී ඇත.

1. හංස සංදේශයේ 183 වන පද්‍ය ලෙස ගැනෙන දසපද සැහැල්ල, එකල වත්තල විහාරයක් තිබූ බවත් එය වනවාස විහාරයක් වූ බවත් දැක්වේ.
"වත්තල වෙහෙර වැඩැ වැඩැ උන් වනවාසයෙහි" ලෙස එම දසපද සැහැල්ල ඇරබේ.

2. තිසර සංදේශයට අනුව එකලද වත්තල ඉතා ජනාකීර්න වෙනත් ප්‍රදේශ වලින් පැමිණි ජනයා වසන ප්‍රදේශයක් බවත්, සුන්දර කාන්තාවන් වෙසෙන පෙදෙසක් බවත් විස්තර කරයි.

නෙතු නිල් උපුල් ගහනත කුසුම වත්තල
වරඟන වොරැඳි සරහන නළල වත්තල
නන්දෙසි නො සළ සත හට සෙතට වත්තල
බල සහතොසින් සව් පිරිනු'දුල වත්තල (100 කව තිසර සංදේශය )

3. මයුර සංදේශයට අනුව,
වත්තල විශාල බල කොටුවක් බැඳ එය ප්‍රදේශයේ ආරක්ෂාවටත් මුතුරාජ වෙල අස්වැද්දීම භාරවත් කටයුතු කල බව දඹදෙනිය රාජධානිය ගැන ඇති වංශ කථාවල දැක් වේ. ගම්පොළ යුගයේ රචිත මයුර සංදේශය මේ ගැන සඳහන් කරයි.
අත්තල උදුල අවි රුපු කැල සසල
ගන්නිල අනල කර විකුමන් පෑ අතුල
වත්තල මෙබල වෙත සලසා ජය මඟුල
සෙත්බල සියල සිරිදුන මැනවි සුවිපුල

ඔබ වත්තල ප්‍රදේශය ගැන යම් තරමක හෝ දැනීමක් ඇත්තෙක් නම් අසා ඇති බලගල නම් ප්‍රදේශයක්. මෙය ඇත්තේ ඇලකන්ද පාරේ ගොස් හැරී යන තරමක කඳු ගැටයකයි. අද මේ ප්‍රදේශය ඉතාමත් ජනාකීර්ණ පෙදෙසකි. මෙලෙස බලගල යනුවෙන් හදුන්වන්නේ ඒ කාලයේ මේ ප්‍රදේශයේ බලධාරියා විසූ පෙදෙස වීම නිසායි. ඉහත කවේ සඳහන් බලකොටුව පිහිටා ඇත්තේ මෙහිය.

මෙම බලකොටුව තනවා ඇත්තේ සිව් වැනි විජයබාහු රජතුමා සිය පියාණන්ගේ ආරක්ෂාව සඳහායි. (පණ්ඩිත පරාක්‍රමබාහු ) මෙම බලකොටුවේ වැදගත්කම පෙනෙන්නේ මෙහි නවතා ඇත්තේ තිලෝක මල්ල නම් විජයබාහු රජුගේ සහෝදරයා වීම නිසායි.

4. කෝට්ටේ රාජධානි යුගය වන විට වත්තල වෙළදාම අතින් දියුණු තත්වයක විය. හංස සංදේශයේ එන මේ කවෙන් ඒ බව පැහැදිලි වේ.

සුරඹ කෙළෙන සුර ගඟ තුල් තරඟයෙනි
කළඹ නැඟී යන සිදුවිදුදරන් මෙනි
කොළඹ විසල් වත්තල් පුත්තූරුවෙනි
නරඹ යනෙන වෙළඳුන් ඔරු පාරුවෙනි (79 කව හංස සංදේශය )

වත්තල ප්‍රදේශයේදී ඔරු පාරු වලින් යන එන වෙළඳ ජනයා නරඹන ලෙස හංසයාට කියා ඇත.

5. සවැනි පැරකුම්භාවන් සමයෙහි රචිත කෝකිල සංදේශයේහිද වත්තල පිළිබඳ සඳහන් වෙයි.
වත්තල කුසුම තුඟු නැහැ වොරැඳි හැම සඳ
වත්තල පලනිමල පියයුරු බරිනි නද
වත්තල නළල සුදිලිය ලිය රැඳි නොමඳ
වත්තල සොඳුරු සිරි දැක යන් මඳක් ඉඳ
කොවුලාට වත්තල ප්‍රදේශයේදී එහි වූ ඉතා රූමත් කාන්තාවන් බලා යන ලෙස කියයි.

බෞද්ධ සංස්කෘතික තොරතුරු. වත්තල වනවාසී විහාරය.
මෙම විහාරය මා දහම් පාසැල් අධ්‍යාපනය ලද තැනයි. ඒ ගැන මගේ සිතේ සියුම් සතුටක් ඇත.
අප ඉහත කිව් හංස සංදේශයේදීම වත්තල වනවාසී වෙහෙරක් ඇති බව පවසයි. එවකට එහි විහාරාධිපති වූයේ පූජ්‍ය නාගසේන හිමියන්ය. එතුමාගේ ශිෂ්‍ය වනරතන හිමියන් ඉන්පසු නායකත්වයට පත් වී ඇත. මෙම වනරතන හිමියන් කෑරගල පද්මාවතී පිරිවෙනෙහි අධිපතීත්වයද දරා ඇත. හංස සංදේශයේ එන මේ පදය නාගසේන හිමියන් ගැන රචිතය.

වත්තල වෙහෙර වැඩැ වැඩැ උන් වනවාසයෙහි
නාගසේන මහතෙර්ඳුන්ට මුනුබුරු
බෝගණිසරු ඇළසෙන්ගමු හුනන්නරු

පූජාවලියට අනුව තෙවැනි විජයබාහු රජු තම නමින් විහාරයක් කරවූ බව සඳහන් වේ. දඹදෙණියේ රජ වූ තෙවැනි විජයබාහු රජුගේ කාලය ක්‍රි. ව. 1232 1236
වන අතර එම කාලයේදී වත්තල විජයබාහු විහාරය ඉදිවන්නට ඇත. මෙයත් වනවාසී විහාරයත් එකක්ම බව විශ්වාස කරයි.

වත්තල යටත් විජිත යුගය.
පෘතුගීසි - සිංහල සටන්.
සිව් වැනි විජයබාහු සමයේ ඉදිකල බලකොටුවේ සහ වත්තල තොටුපලේ වැදගත්කම ඉහල ගියේ මේ යටත් විජිත සමයේය. විශේෂයෙන් පෘතුගීසි සමයේය. මිනුත් මායාදුන්නේ සහ සීතාවක රාජසිංහයන් කල අති විශෙෂ සටන් වලදී වත්තල ප්‍රදේශය එක සටන් බිමක් විය.
සිංහලයාගේ වත්තල අයිති කරගත් පෘතුගීසීන් මැඬීමට මායාදුන්නේ රජු 6000 හේවා බල ඇණියක් ගෙන සටන් වැදුනත්, විශාල පෘතුගීසි හමුදාවක් රැගෙන ආ දියෝගෝද මේලෝ සෙන්පතියා සිංහල සේනාව සී සී කඩ කරමින් යුදයෙන් ජය ගත්තේය.
මෙම සටනින් වත්තල ජනයාට දැඩි ආහාර අහේනිය ඇති විය. එමෙන්ම ඔවුන්ගේ දේපල විශාල වශයෙන් විනාශ විය.

මෙවර පලා ගිය සිංහලයන් නැවතත් මායාදුන්නේ රජු යතේම පෘතුගීසීන් හා සටන් වැද ජයගෙන බලකොටුව සහ තොටුපල සියතට ගත්හ. නමුත් දියෝගෝද මේලෝ නැවතත් සටන් වැද සිංහලයන් පන්නා දමා තම බලය ස්ථාපිත කර ගත්හ. පසු නොබසින මායාදුන්නේ රජු තෙවනි වරටත් තම බලය ස්ථාපිත කර කොටු බැම්ම සහ දිය අඟල වඩා ප්‍රකෘතිමත් කරවීය. නැවතත් වත්තල බලය පතා සටන් වැඳුනු පෘතුගීසීන් සිංහලයන් 200 පමණ මරා දමා බලය අත්පත් කර ගත්හ. ඔවුන්ගේ මිය ගියේ 11 පමණි. සටන පැය 6 පමණ තිබිණි.

වත්තලදී සිඳු වූ දරුණුම සටන ලෙස වාර්ථා වන්නේ දියෝගුද මේලෝ සහ සිංහල සේනාපතියෙකු වූ කුරුප්පු මුදලි අතර සටනයි. මෙය 1576 ජුලි මස 25 දින තොටුපල සහ බලකොටුව අල්වා ගැනීමට සිදු වූවකි. සිංහලයන් සතුව 2500 බල ඇණියක්ද ඇතුන් සිව් දෙනෙක්ද විය. පෘතුගීසීන් සතුව හේවායන් 450 සහ ලස්කිරිඤ්ඤ භටයන් 700 පමණක් විය. මුලින් සිංහලයන් අති බිහිසුණුව සටන් කර ජය ගැනීමට ආසන්න වුවත් අවසානයේ සිංහල හමුදාවට එලව එලවා පහර දුන් බව සඳහන් වේ.

කෙසේ හෝ මින් පසු දැඩි සටන් වත්තල ආශ්‍රිතව සටහන් නොවේ.
ඔබ දන්නා පරිදි වත්තල ටොයෝටා ලංකා ගොඩනැගිල්ල සහ වත්තල විල්ෆ්‍රඩ් කොම්පැණිය ඇති තැන අතර එකල සුප්‍රසිද්ධ ගොනා කෝවිල නම් ඝන දෙවි කෝවිලක්ද, මීගමු පාරේ හරියටම එතැනට ඉදිරිපසින් අද විශාල සාප්පු සංකීර්ණයක් තනා ඇති බිම බලගල කොටුව සහ පෘතුගීසි සමය වනතෙක්ම සුසාම භූමියක්ව පැවත ඇත.

මේ සටහන මින් නිම කරමි.


නැවතත් සුපුරුදු විශ්වාරම්භයට හෙට අනිද්දාම.........................

Thursday, September 1, 2011

විශ්වාරම්භය පෙරදිග විද්‍යාවන් (ප්‍රමාණ) 02

දැන් අපි අපේ මේ කතිකාවේ පෙරදිග විද්‍යාවන් විශ්වය ආරම්භ වූ ආකාරය දැකලා තියන්නේ කොහොමද කියන කාරණය විස්තර කරමින් සිටියේ, එහිදී අපි කථා කලා බටහිර දර්ශනයේ මේ ගැන කියවෙන දේ, එතකොට ආයූර්වේද විද්‍යාව පෙරදිග දර්ශණයේ පිහිට ලබාගෙන ප්‍රකෘති පුරුෂ වාදය මඟින් විශ්ව උප්පත්තිය ගැන කතා කරන ආකාරය.

ඒකට උදව් වෙන සාංඛ්‍ය දර්ශනය ගැන අපි යම් තරමකට අද කථා කරමු.

අපි දන්නවා ප්‍රකෘති සහ පුරුෂ කියන දෙක අපට උපයෝගී වෙනවා විශ්වොත්පතිය ගැන කථා කරන්න. මෙම ප්‍රකෘති සහ පුරුෂ කියන තත්ත්වයන් දෙකේ භේදය ගැන කරුණු සඳහන් වෙන්නේ අපි මේ කථා කරන සාංඛ්‍යය දර්ශනය තුල. දැන් නවීන විද්‍යාවන්ට අනුවත් විශ්ව ආරම්භය ගැන කරුණු හදාරන්න අපිට අවශ්‍යවෙන ප්‍රධානම සාධකයක් වෙන්නේ ගණිතය. සංඛ්‍යා සහ මේ ගනනය කිරීම් මගින් ප්‍රකෘති සහ පුරුෂ කියන දෙකේ වෙනස අපිට විශ්ව උප්පත්තිය ගැන හොයනකොට මුලින් සොයා ගත යුතු වෙනවා. එයට අපට සහාය වෙන්නේ තවත් සාංඛ්‍ය දර්ශනයේ එන සාධකයක් වෙන ප්‍රමාණ.

දැන් ඔබට පෙනෙනවා ඇති මේ සාංඛ්‍ය දර්ශනය කියන්නේ වෙන මොකවත් නෙමෙයි ගණිත ක්‍රම. සාංඛ්‍යය දර්ශනය ඇත්තෙන්ම අද අපි භාවිතා කරන සම්භාව්‍ය ගණිතයේ එන සියළුම ක්‍රමවේදයන් ඇතුලත් උසස් දර්ශනයක්. මෙකෙන්ම ඔබට පෙනෙනවා ඇති මේ අය විශ්ව උප්පත්තිය ගැන කියන්නේ ගණිත ක්‍රමවල පිහිටෙන්. ඇත්තෙන්ම ඇත්ත ඒකයි. ඒත් වෙලා තියන දේ තමයි, මේ ගණිත් විද්‍යාවන් තුල එන බොහෝ වචන අද දූෂනය වී තිබීම. වචනවල තේරුම්, වෙනත් තේරුම් බවට පත් වීම. එම නිසා අද එම වචනවල තේරුම් අනුව අපි සිතා බැලීමේදී අපිට මේවා පෙනෙන්නේ විහිලු වගේ. නමුත් මේ දෙවල් ඉගෙනීම තුලින් ඒ ව්‍යාකූල භාවය නැති වෙලා යනවා.

කපිල දර්ශනය සාංඛ්‍ය දර්ශනය කියන නමින් හැදින් වෙන්නේ සංඛ්‍යා ආශ්‍රයෙන් වාද කරන දර්ශනය නම් අර්ථයෙන්.

විශ්වාරම්භක අවස්ථාව පිළිබඳ ගනනයට උපකාරී වන සාධක කීපයක් මේ සාංඛ්‍ය දර්ශනයේ තිබෙනවා. අපි පිලිවෙලින් බැලුවොත්, ප්‍රකෘති, පුරුෂ, ප්‍රමාණ, මහත් යන මේ සාධක තමයි මේ සඳහා උපකාරී වෙන්නේ. මේ සියළුම සාධකයන් සංඛාවෙන් 25 වෙනවා. මේ විසි පහ මුලින්ම
1. ව්‍යක්ත
2. අව්‍යක්ත
3. ඥ
ලෙස කොටස් තුනකට බෙදෙනවා. ඊට පසු නැවතත් සිව් කොටසකට බෙදෙනවා. ඒවා නම්,
1. ප්‍රකෘති
2. විකෘති
3. ප්‍රකෘති විකෘති
4. අනුභය
මේවා රූප යනුවෙන් හදුන්වනවා.

කපිල දර්ශනය පිළිබඬ්හ් ලියවුනු පොත් පත් දැනටත් ලබාගත හැකියි.
1. ඊශ්වර කෘෂ්ණයන්ගේ "සාංඛ්‍යාකාරිකාවය"
2. මේ පොත සඳහා ලියවුනු ටීකා, ටිප්පනි ග්‍රන්ථ විශාල ප්‍රමාණයක් සොයා ගත හැකියි.

ප්‍රමාණ
සාංඛ්‍ය දර්ශනයේ එන ප්‍රධානම සාධකයක් වෙන්නේ ප්‍රමාණයි. ප්‍රමාණ නැතිව ප්‍රකෘති සහ විකෘති යන සාධක දෙක අපට ඔප්පු කර පෙන්විය නොහැකියි.
මේ ප්‍රමා කියන වචනයේ තේරුම වෙන්නේ තත්වාවබෝධය යනුයි. එම නිසා යථාර්ථ ඥානය මැනීමට ප්‍රමාණ අත්‍යාවශ්‍යයි. තත්වාවබෝධය ලබා ගැනීමට ගත යුතු මාර්ගය නැතහොත් ප්‍රමාණය ප්‍රමාණ නමි. නිවැරදි දැණුම ප්‍රමාණයි. තවද එය ලැබෙන මාර්ගද ප්‍රමාණ වේ.

උදයන්ගනාචාර්‍ය්‍යයන්ද, කණාද, අක්ෂපාද, නාගාර්ජුන, වසුබන්ධු, දීංනාග, ධර්මකීර්ති, යන ආචාර්යවරු මේ ප්‍රමාණ පිළිබඳ වැදගත් කරුණු ලෝකයට හෙලි කලහ.

තුලා, නැළි, මිණුම් මඟින් විෂය කරගත හැකි දේ ප්‍රමේය වේ. එනම්, රෙදි පිලි කෝදු මගිනුත්, හාල් ආදිය බුසල් නැලි මගිනුත් මැන ගැනීමට හැක. එනම් ප්‍රමාණ කිරීමට හැකිය.

ප්‍රමාණ ප්‍රභේද
විවිධ දර්ශනවාද වල විවිධ ප්‍රමාණ භාවිතා කලහ.
1. චාර්වාක දර්ශනයේ ප්‍රත්‍යක්ෂ ප්‍රමාණ පමනක් ද,
2. ජෛනයෝ ප්‍රත්‍යක්ෂ, අනුමාන, ශබ්ද, ද,
3. බෞද්ධයෝ ප්‍රත්‍යක්ෂ, අනුමාන,
4. මීමන්සකයෝ ප්‍රත්‍යක්ෂ, අනුමාන, ආගම,
5. ප්‍රභාකරයන්ගේ ප්‍රත්‍යක්ෂ, අනුමාන, උපමාන, ආගම,
6. වෙදාන්තවාදීන් විසින් ප්‍රත්‍යක්ෂ, අනුමාන, ශබ්ද,
7. යෝග දරශනයේ ප්‍රත්‍යක්ෂ, අනුමාන, ආප්ත,
8. ජෛමිණීකයෝ අර්ථාපත්ති, සම්භව, අභාව, ප්‍රතිභා, ඓතීභය, උපමාන,
9. වෛශේෂිකයන් ප්‍රත්‍යක්ෂ, අනුමාන, උපමාන,
10. සාංඛ්‍යයන්ගේ දෘෂ්ට, අනුමාන, ආප්තවචන,

ප්‍රමාණ ලක්ෂණ.
ප්‍රමාණ හැදින්වෙන ලක්ෂණ ප්‍රමාණ ලක්ෂණ වේ. කිසියම් ඥානයක ප්‍රමාණිකත්වය ඇති වන්නේ ව්‍යවාහාරය අනුවයි. අර්ථ ක්‍රියාවෙහි සමත් වස්තුව පමණක්ම පරමාර්ථ වන වස්තුව නොවේ.කිසියම් ඥානයකින් එම වස්තුව ඇති බව දැනගත හැකි නම් ඒ ඥානය ප්‍රමාණ නමි. ප්‍රත්‍යක්ෂ ප්‍රමාණය ඉහත සියලු ප්‍රමාන අතුරින් ශ්‍රේෂ්ට වේ.

අතීන්ද්‍රිය ප්‍රත්‍යක්ෂ නොවන දේවල්, ඥානය එනම් සාමාන්‍ය දැකීමෙන්, අනුමානයෙන් සහ යම් පමනකට ශේෂවත් අනුමානයෙන්, ඇති වෙයි. කිසියම් අප්‍රත්‍යක්ෂ වස්තුවක් මේ දෙකින්ම සිද්ධ නොවේ නම්, එය ආගම ප්‍රමාණයෙන්, සිද්ධ වන්නේය.

සාංඛ්‍ය දර්ශනයේ සඳහන් වන පිලිවෙලට පංච විංශති තත්ත්වය ව්‍යක්ත, අව්‍යක්ත, හා ඥය යනුවෙන් යලි තුන් කොටසකට බෙදේ. ඒ පස් විසි තත්ත්ව අතරින් අස්ථි, චර්ම, මාංසාධීන්ගේ, ස්වරූපයෙන් පවතින පෘත්ව්‍යාදී ධාතු ප්‍රත්‍යක්ෂයෙන් දැනගත හැකිය.

අවබෝධ කර ගැනීමෙහිලා අපහසු පදාර්ථ අවබෝධ කර ගැනීමට දර්ශනය වැදගත් වේ. ප්‍රකෘති පුරුෂ වූ කලී එවැනි අතීන්ද්‍රිය පදාර්ථයන් දෙකකි. එහෙයි මෙවැනි පදාර්ථයන් අවබෝධ කර ගැනීම සම්බන්ධයෙන් සාමාන්‍ය දෘෂ්ටි අනුමානය වැදගත් වේ. මේ අනුව පැහැදිලි වන්නේ මානසික තත්ත්වයන් වන සත්ව, රජස්, තමස් යන ගුණ තුනේ සාම්‍යය අවස්ථාව මේ ප්‍රකෘති මගින් පැහැදිලි කරන බවයි. සත්ව රජස් තමස් යනුවෙන් හැදින් වෙන්නේ, රජස් තමස් දෙක මානසික දෝෂ වශයෙනුත් සත්ව මානසික සාමාන්‍ය සමබර තත්වය වශයෙනුත් අර්ථ විග්‍රහ කරනවා. මේ තත්තවවල සාම්‍යය හෙවත් සමබර අවස්ථාවයි.

යම් වස්තුවක් හෝ පදාර්ථයක් ප්‍රත්‍යක්ෂ නොවීමටත් යම් යම් හේතූන් බලපානවා.
1. අතිදූරත්වය.
2. අතිසමීපත්වය.
3. ඉන්ද්‍රිය ඝාතය.
4. අනවස්තානය.
5. සූක්ෂ්මත්වය.
6. ව්‍යවධානය.
7. අභිභවය
8. සමානාභිභාරය.
වැඩියෙන් දුර වීම, වැඩිපුර සමීප වීම, ඉන්ද්‍රිය විනාශ වීම, අස්ථානගත වීම, ඉතා කුඩා වීම, අවධානයට යොමු නොවීම, අභිබැවීම, ඉතාම සමානවීම. මෙම හේතු මත ප්‍රත්‍යක්ෂයෙන් බැහැර වීමට හැකියි.

අපි සාංඛ්‍ය දර්ශනයේ යම් යම් කොටස් අපේ මේ කතිකාවට අවශ්‍ය කොටස් ඉතා කෙටියෙන් කථා කලා. දැන් අපි විශ්වයේ ආරම්භය සිදු වූ හැටි ගැන බලන්න සූදානම්.

(මෙහිදී මම කෙටි අදහසක් කියන්න ඕනෙ. මම මේ ලිපි මාලාව ලියන්නේ බුදු දහම සහ භාරතීය දර්ශන අනුව විශ්වය, ජීවය ඇති වූයේ කෙසේද කියලා පෙන්වීමේ අරමුණ ඇතුවයි. මම කවමදාවත් මේ ලෝකෙ තිබෙන කිසියම් වූ ආගමක් පහත් කොට සලකන්නේ නැහැ. ඒ ඒ ආගම් තිබෙන්නේ ඒවා අදහන අයගේ විශ්වාසයන් අනුව. අපි එම විශ්වාසයන්ට ගරු කල යුතුයි. මම ආගම් පිළිබඳ කිසිවක් දන්නේ නැහැ. මෙහි මම දක්වන්නේ ආගමික මත වාද නෙමෙයි. මේවා හුදෙක්ම දාර්ශනික කරුණු. කොටින්ම කිව්වොත් මෙම කරුණු හොඳින් දන්නා අයෙක්ට වුවත් තම ආගම වෙනම ඇදහීමේ නිදහස මම පිලිගන්නවා. ඒවා පෞදගලික කාරනා. ඒ නිසා මේ ලෝකෙ තිබෙන කිසිම ආගමක් සම්බන්ධ කරුණු වලට මේ දාරශනික මත වාද වලින් කිසිම හානියක් විය නොහැකියි.)

අනිත් කාරණය මේ වැනි දෙවල් ඉගෙන ගත්තාට අපිට ලැබෙන්නේ දැනුමක් විතරයි. විමුක්තිය ලබන්න මේ දෙවල් වැඩක් නැහැ. ඒ එසේ වුවත් ලෝක ස්වභාවය ගැන දැන ගැනීම වැදගත් වේ යැයි මම සිතනවා.


ඊලඟ ලිපියෙන් පුරුෂ යනු කුමක්දැයි අපි බලමු……………………….